Товч агуулга
- 1.5 сая нь хуурамч хаягтай гэсэн мэдээлэл байхгүй гэдгийг ХХЗХ мэдэгдлээ.
- Метагийн Аюулгүй байдлын хамтрагч байгууллага болох FARO foundation-д мөн ийм тоо судалгаа байхгүй гэдгийг хэлэв.
УИХ-ын гишүүн Д.Тогтохсүрэн Пүрэв гарагийн УИХ-ын чуулган дээр Сонгуулийн Ерөнхий Хорооны гишүүнийг сонгох, чөлөөлөх тухай асуудлыг хэлэлцэх үеэр Цагдаагийн Ерөнхий Газрын дарга Т.Сүхболдоос цахим сүлжээний зохицуулалтын талаар асуухдаа “Албан бус мэдээгээр Монгол Улсад 2.6 сая фэйсбүүк хаяг байгаа. Үүний 1.5 сая нь хуурамч хаяг байна. УИХ-ын гишүүд, улс төрчдийг жирийн үед гөвж байна. Энэ хуурамч хаягуудыг илрүүлэх техникийн боломж байна уу” гэсэн юм.
Чуулганы танхимд түүний хэлсэн, хуурамч хаягийн талаарх мэдээллийг бид нягталлаа.
Factcheck:
Харилцаа Холбооны Зохицуулах Хорооны мэдээллээр 2023 оны байдлаар Монгол Улсад фэйсбүүкийн 2.8 сая хэрэглэгч байна. Харин үүнээс 1.5 сая нь хуурамч хаягтай гэсэн мэдээлэл байхгүй гэдгийг тус байгууллага мэдэгдлээ.
ХХЗХ нь 2016 оноос Фэйсбүүк компанитай уулзалтууд хийснээр Монгол Улсад аюулгүй, ёс зүйтэй нийгмийн сүлжээний орчныг бий болгоход хамтран ажиллах шаардлагатай гэдэгт санал нэгдэж, Фэйсбүүк платформ дахь хуурамч хэрэглэгчийн бүртгэлийг устгах, хууль бус контентийг хязгаарлах чиглэлээр хамтран ажиллах болсон. Улмаар аливаа хууль бус контентийн талаарх гомдол хүсэлтийг түргэн шуурхай шийдвэрлэх, зохицуулалтыг хэрэгжүүлэхэд шаардлагатай “Government-Case-Work-Channel” буюу шууд харилцах ногоон сувгийг 2019 оны аравдугаар сард Монгол Улсад анх удаа албан ёсоор тогтоосон юм.
Мөн бид Faro foundation байгууллагатай холбогдсон юм. Тус байгууллага нь 2019 оноос хойш Метагийн Аюулгүй байдлын хамтрагч байгууллагаар ажиллаж байгаа бөгөөд цахим аюулгүй байдлын боловсрол олгох чиглэлд төсөл хэрэгжүүлж ирсэн. Энд мөн хуурамч хаягийн тооны талаар судалгаа мэдээлэл байхгүй гэдгийг хэллээ.
УИХ-ын гишүүн Д.Тогтохсүрэнгийн туслах руу бид холбогдож, энэ талаар тодруулсан боловч завгүй гэх шалтгаанаар хариулт өгсөнгүй.
Иймд “Монгол Улсад 2.6 сая фэйсбүүкийн хаяг байгаа. Үүний 1.5 сая нь хуурамч” гэж хэлсэн Д.Тогтохсүрэн гишүүний үг НОТЛОГДСОНГҮЙ.
