Товч агуулга
Вакцинууд аливаа өвчнөөс, нас баралтаас үр дүнтэй сэргийлдэг тул өнөөдрийг хүртэл улс орнууд зөвлөсөөр байна.
ДЭМБ-ын статистикаар вакцины тусламжтайгаар жил бүр 2-3 сая хүний амийг аварч байна.
КОВИД-19-ийн вакцин дэлхийн 19.8 сая хүнийг үхэхээс сэргийлснийг The Lancet сэтгүүлд хэвлэгдсэн судалгаа харуулсан.
Zanaa Jurmed гэх фэйсбүүк хэрэглэгч 2023.01.03-нд “ВАКЦИН БОЛ ШИНЖЛЭХ УХААН НЭРТЭЙ БИОЗЭВСЭГ!!! БҮХ ТӨРЛИЙН ВАКЦИН БОЛ ХОРРРРР!!!
КО БОЛОН БҮХ ТӨРЛИЙН ТОМУУНЫ ВАК БОЛ НҮБ, ДЭМБ, CDC ЗЭРЭГ ДЭЛХИЙН ЭЛИТ ГЭХ САТАНУУДЫН ГАРГАСАН БИОДАЙНААР ДЭЛХИЙН ХҮН АМЫГ 80% УСТГАХ ОЛОН 10 ЖИЛИЙН ӨМНӨӨС ТӨЛӨВЛӨЖ ХИЙСЭН УЛС ТӨР ЭРХ МЭДЛИЙН ДАРАМТ ШАХАЛТ!!!!!
ИЙМ ХОРООР АРД ТҮМНЭЭ УСТГУУЛАХ БОЛОМЖ БҮРДҮҮЛСЭН БҮХ ХҮН ШУУД БОЛОН ШУУД БУСААР БУРУУТАЙ МӨН ХОХИРОГЧИД НЬ ТЭД Ч ӨӨРСДӨӨ!!!!!” гэх пост оруулжээ.
Уг агуулгыг нягталж өгөх хүсэлт ирсний дагуу нягталлаа.
Factcheck:
Вакцинуудын найрлага дахь туслах бодисууд нь биеийн дархлааны хариу урвалыг идэвхжүүлдэг бөгөөд хүний биед сөрөг нөлөө үзүүлдэггүй болохыг өнгөрсөн 60 жилийн судалгаанууд нотолно гэдгийг АНУ-ын Хүнс болон эмийн захиргаа мэдэгдсэн байдаг.
КОВИД-19 цар тахлын үеэр мРНХ технологид суурилсан анхны вакциныг гарган авсан бөгөөд нас баралтаас үр дүнтэй сэргийлж байгаа тул өнөөдрийг хүртэл улс орнууд вакцинд хамрагдахыг зөвлөсөөр байна.
ДЭМБ-ын статистикаар вакцины тусламжтайгаар жил бүр 2-3 сая хүний амийг аварч байна.
АНУ-ын Халдварт өвчний хяналт, сэргийлэлтийн төвийн судалгаагаар хүүхэд байхдаа хийлгэсэн вакцины үр дүнд 4 сая хүнд жил бүр үхлийн аюулаас мултарч байна. 2030 он гэхэд 51 сая хүн вакцины тусламжтай амьд гарах ба Улаанбурхны вакцины үр дүнд 19 сая Гепатит В-ийн эсрэг вакцины үр дүнд 14 сая хүн үхлээс сэргийлэх тооцоо байна.
Дэлхийн таван хүүхэд тутмын нэг нь анхан шатны дархлаажуулалтад хамрагдаж чадахгүй байгаа ба жилд 2 сая гаруй хүүхэд вакцинаар хамгаалах боломжтой халдварт өвчний улмаас нар барсаар байна.
КОВИД-19-ийн вакцин дэлхийн 19.8 сая хүнийг үхэхээс сэргийлснийг The Lancet сэтгүүлд хэвлэгдсэн судалгаа харуулсан.
Монгол Улсын хувьд 2014 онд Улаанбурхан өвчин бүрэн устсан орон хэмээн зарлаж байв. Гэвч 2016 онд Улаанбурхан өвчний дэгдэлд гарч, 0-5 насны 59 хүүхэд энэ өвчнөөр эндсэн юм. Улмаар Засгийн газар дархлаажуулалтыг нэн яаралтай авч хэрэгжүүлсний үр дүнд өвчлөлийг цааш улам дэгдэхээс урьдчилан сэргийлж чадсан.
Мөн КОВИД-19-ийн эсрэг вакцинжуулалтыг эрт эхлүүлээгүй бол 2021 оны долдугаар сарын 1-н гэхэд 15-45 мянган нас баралт бүртгэгдэх эрсдэл байсныг ХӨСҮТ, эрдэмтдийн зөвлөл судалж тооцсоноо танилцуулж байв.
Иймд дээрх пост дахь мэдээлэл нь олон нийтийг төөрөгдүүлсэн, ТАШАА мэдээлэл байна.
Аливаа мэдээллийг албан ёсны эх сурвалжаас авч, үргэлж нягталж байхыг Factcheck.mn сануулсаар байгаа билээ.
Эх сурвалжууд:
- ХӨСҮТ-ийн Дархлаажуулалтын алба
- ЭМЯ
https://www.cdc.gov/globalhealth/immunization/data/fast-facts.html
https://www.thelancet.com/journals/laninf/article/PIIS1473-3099(22)00320-6/fulltext
НҮБ-ын Хүүхдийн сантай хамтран бэлтгэв.
