Товч агуулга
Дани улсын Эрүүл мэндийн яамнаас 18-аас доош насны хүмүүст COVID-19 вакциныг санал болгохоо больсон ч энэ насны бүлгийн вакцинжуулалтыг хориглоогүй.
Данийн хүн амын 81% орчим буюу 5.8 сая хүн коронавирусийн эсрэг 2 тун вакцин хийлгэсэн бол 62% нь бүүстер тунд хамрагджээ.
Огт вакцинд хамрагдаагүй иргэдээ тус улс вакцин хийлгэхийг зөвлөсөн хэвээр байна.
Дани улс КОВИД-19-ийн эсрэг вакциныг 18-аас доошн насны хүүхдүүдэд хийхийг хориглосон тухай тус улсын WesternStandard сайт наймдугаар сарын 10-нд мэдээлжээ.
Уг мэдээллийг Associated Press агентлаг нягталсан байна.
FactCheck:
Дани улсын Эрүүл мэндийн яамнаас 18-аас доош насны хүмүүст COVID-19 вакциныг санал болгохоо больсон ч энэ насны бүлгийн вакцинжуулалтыг хориглосон гэсэн үг биш бөгөөд Ковид-19-ийн хүнд өвчнөөр өвчлөх эрсдэлтэй хүүхэд, өсвөр насныхан эмчийн зөвлөснөөр вакцин хийлгэж болно гэж тус яам мэдэгдсэн байна.
Тус улсын вакцинжуулалтын хөтөлбөрт хүүхэд, залуучууд COVID-19-ийн омикрон хувилбараар хүндээр өвчлөх нь маш ховор байгаа тул 18-аас доош насныхан долдугаар сарын 1-нээс эхлэн эхний тунг хийлгэхгүй байж болно гэжээ. Харин хүнд өвчин тусах эрсдэлтэй хүмүүс эрүүл мэндийн үзлэгт хамрагдсаны дараа хоёр дахь тунгаа авч болно гэсэн байна.
Данийн ЭМЯ-ны хэвлэлийн төлөөлөгч Associated Press агентлаг энэ талаар и-мэйлээр тайлбар ирүүлэхдээ “COVID-19-ийн хүнд хэлбэрээр өвчлөх эрсдэл өндөртэй хүүхэд, залуучууд үзлэг хийлгэсний дараа вакцинд хамрагдах боломжтой хэвээр байгаа” гэдгийг хэлжээ. Тус улс намар болон өвлийн дархлаажуулалтаа аравдугаар сард хийх юм байна.
ЭМЯ-ных нь мэдээлснээр Данийн хүн амын 81% орчим буюу 5.8 сая хүн коронавирусийн эсрэг 2 тун вакцин хийлгэсэн бол 62% нь бүүстер тунд хамрагджээ.
Мөн огт вакцинд хамрагдаагүй иргэдээ вакцин хийлгэхийг зөвлөсөн хэвээр байгаа аж.
Тиймээс Дани улс хүүхдүүдэд КОВИД-19 вакцин хийхийг хориглосон гэдэг нь олон нийтийг төөрөгдүүлсэн ТАШАА мэдээлэл байна.
Эх сурвалжууд:
https://apnews.com/article/fact-check-Denmark-vaccine-children-439807145775
https://experience.arcgis.com/experience/9824b03b114244348ef0b10f69f490b4/page/page_3/
НҮБ-ын Хүүхдийн сантай хамтран бэлтгэв.
