Tsahiur.mn сайт 2022.09.01-ний өдөр “УБ-Бээжин чиглэлийн нислэгийн тийз өдөрт сая саяаар өссөөр 10,2 сая төгрөгт хүрчээ” гэсэн гарчигтай мэдээлэл нийтэлжээ.
Уг мэдээлэлд Ж.Сүхбат гэх оюутныг эх сурвалж болгосон бөгөөд “Улаанбаатар-Бээжин чиглэлийн нислэгийн тийз 2022.08.08-ны өдрийнх 2.2 сая төгрөг байсан бол 2022.09.06-ны нислэгийн үлдсэн суудлууд 10.2 сая төгрөгт хүрсэн байна” гэж бичсэнийг нягталж өгөх хүсэлт уншигчаас ирсний дагуу нягталлаа.
Factcheck:
Tsahiur.mn тийзийн үнийн мэдээллийг мэдээндээ оруулахдаа nisleg.mn сайтыг ашиглан хайлт хийж үзжээ.
Яг энэ дагуу 2022.09.02-ны орой 20:00 цагт хайлт хийж үзэхэд 8,587,200 төгрөгийн үнэ санал болгож байна. Уг санал руу нэвтэрч орвол Улаанбаатараас Токио, Токиогоос Бээжин хүрэх буюу дамжин хүрэх нислэг байна.
БНХАУ-д коронавирусийн хорио цээрийн дэглэм үргэлжилсээр байгаа бөгөөд дэлхийгээс бараг таслагдаад байсан Бээжин долдугаар сарын сүүлийн долоо хоногт олон улсын зарим нислэгээ сэргээж эхэлснийг Bloomberg мэдээлсэн.
Гэвч Монгол Улсаас ирэх зогчигчдоос коронавирусийн халдвар илэрсээр байгаа тул найм, есдүгээр сард хийхээр төлөвлөж байсан МИАТ-ын нислэгүүдийг цуцалж байгааг Гадаад харилцааны яам мэдээлсэн.
Өөрөөр хэлбэл, Улаанбаатараас Бээжин рүү цар тахал гарснаас хойш өнгөрсөн хоёр жилд шууд нислэг хийгээгүй хэвээр байна.
Энэ талаар МИАТ компанийн захирал Б.Мөнхтамир “Ийгл” телевизэд дараах тайлбарыг өнөөдөр хийгээд байгаа юм.
“МИАТ руу нислэг хийхгүй байгаа. Хятад улс хилээ нээгээгүй байгаа. Хятадын ИНЕГ-аас сард нэг удаа нислэг хийх зөвшөөрлийг хоёр талаас хэлэлцсэний үр дүнд өгсөн өгсөн бөгөөд олон шаардлага тавьсан. Нислэгийн суудлын тооны 75% дүүрсэн байх, нислэг бүрээс хамгийн ихдээ 10 хүртэл хүнээс КОВИД илрэх гэх мэт заалт тавьсан. Мөн нислэгүүдээр очсон нийт зорчигч очоод 3 хоног тусгаарлалт байх шаардлага тавьсан. Энэ дагуу Хятадын ИНЕГ МИАТ компанид Улаанбаатар Гуанжоу чиглэлд л нислэг үйлдэх зөвшөөрөл өгсөн. Өнөөдрийг хүртэл МИАТ компани УБ-Бээжингийн нислэгийг үйлдэж эхлээгүй байна.
Үнийн тухай мэдээлэл ор үндэслэлгүй. Нэг нислэгийн зардал 2.2 сая төгрөг байгаа. Оюутнуудад 30 хувийн хөнгөлөлт үзүүлэх шийдвэр гарсан байгаа” гээд tsahiur.mn сайтын мэдээллийг тэрбээр няцаав.
Иймд tsahiur.mn сайт олон нийтийг төөрөгдүүлсэн, ТАШАА мэдээлэл нийтэлсэн байна.
Эх сурвалжууд:
Bloomberg
ГХЯ
МИАТ
Ийгл ТВ
