Фэйсбүүк орчинд Мягмартогтох Далай нэртэй хэрэглэгч “Халдвартай хүнтэй хавьтал болсон хүн бүр өвдөж байна” гэсэн мэдээллийг нийтэлжээ.
Цар тахлын үед коронавирустэй холбоотой аливаа мэдээллийг заавал нягталж, шалгаж байхыг бид өмнө нь сануулж байсан. Шинэ коронавирусийн халдвар өдөртөө 20-30 шинэ тохиолдлоор нэмэгдэж, нөхцөл байдал хүндэрч болзошгүй энэ үед иргэдийг айдаст автуулах эсвэл хэт худал мэдээлэл түгээх нь эргээд хор хөнөөлтэй болохыг сануулахын зэрэгцээ дээрх мэдээллийг нягталлаа.
Factcheck:
Манай улсын хэмжээнд өнөөдрийн байдлаар шинэ коронавирусийн халдварын батлагдсан 1890 тохиолдол бүртгэгдсэн бөгөөд халдвар авсан хүний ойрын хавьтлуудын 21 хувиас халдвар илэрсэн болохыг Халдварт өвчин судлалын үндэсний төвөөс мэдээлсэн.
ХӨСҮТ-ийн Тандалт судалгааны албаны дарга А.Амбасэлмаа “Улсын хэмжээнд нийт илэрсэн тохиолдлуудын ойрын хавьтлуудаас авсан шинжилгээгээр 21 хувь нь халдвар авсан. Гэвч сүүлийн үед нийслэлд илэрч буй тохиолдлуудын ойрын хавьтлуудын 90 орчим хувь нь халдвар авч байна. Тиймээс ойрын хавьтал болсон хүмүүс халдварт өртөх магадлал өндөртэй байна” гэдгийг хэлсэн юм.
Тэгэхээр хавьтал болсон хүн бүр өвдөж буй биш ойрын хавьтлын 21-90 хувь халдвар авч байгаа юм.
Халдварт өвчний үед ойрын болон дам хавьтал гэх ойлголт байх бөгөөд ойрын хавьтал нь 1.5-2 метрээс дотогш зайд 15 минутаас дээш хугацаанд халдвартай хүнтэй байсан хүнийг хэлдэг болохыг ДЭМБ-аас мэдээлээд буй.
