Өчигдөр буюу 2020 оны 11 дүгээр сарын 29-ний өдөр “Бүх нийтийн бэлэн байдлын зэрэгт шилжүүлсэн хугацааг 12 дугаар сарын 31-ний өдрийн 06:00 цаг хүртэл сунгасугай” гэсэн агуулгатай Засгийн газрын тогтоолын зураг цахим орчинд тарсан юм.
Энэхүү тогтоолын зургийг нягтлахад ХУУРАМЧ болох нь тогтоогдлоо.
Юуны өмнө энэхүү зураг нь дээр дурдсанчлан цахим орчинд 11 дүгээр сарын 29-ний өдөр тарсан боловч тогтоол дээрх он сар өдөр нь өнөөдрийнх буюу 11 дүгээр сарын 30 гэж байгаа нь эргэлзээ төрүүлж буй юм.
Мөн тогтоолын 1 дүгээрт 12 дугаарын сарын 31 хүртэл гэсэн бөгөөд 3-ын тоог сайтар ажиглавал эвлүүлэг болох нь харагдаж байна.
Түүнчлэн Засгийн газрын аливаа тогтоол эрх зүйн мэдээллийн нэгдсэн систем болох www.legalinfo.mn -д байршдаг. Тэгвэл яг энэхүү 181 дүгээр тогтоол нь 11 дүгээр сарын 15-ны өдөр гарсан бөгөөд 12 дугаар сарын 1 хүртэл сунгасан тухай агуулгатай болохыг нягталлаа. Энэхүү тогтоолын эх дээрх он сар өдрийг өөрчилж эвлүүлэн олон нийтэд түгээжээ.
Нягталсан: Ц.Тамир
