Цахим орчинд Tsendee Purev нэртэй хэрэглэгч “Вакцины нэр өөрчлөгдөж, хугацаа нь дууссан байна” гэх мэдээллийг Вакцин хор!! хор!! хор!! хэмээн нийтэлжээ.
Түүний энэхүү мэдээллийг нягталлаа.
Вакцины нэр өөрчлөгдсөн
Factcheck –ХУДАЛ
Манай улс хоёрдугаар сарын 22-ны өдөр БНЭУ-аас 150 мянган хүн тун АстраЗенека вакциныг хүлээн авсан. Уг вакцины хамгийн эхний тарилгыг хоёрдугаар сарын 23-ны өдөр Ерөнхий сайд Л.Оюун-Эрдэнэ хийлгэсэн. Эхний ээлжинд ирсэн 150 мянган хүн тун вакцинаар эмч, эмнэлгийн ажилтан, цэрэг цагдаа зэрэг хариу арга хэмжээний багт ажиллаж буй албан хаагчдыг вакцинжуулахаар болсон юм.
Ингээд 100 мянган хүн тун вакциныг эхний ээлжинд хэрэглэсэн бөгөөд 50 мянган хүн тун нь үлдэж, хоёр дахь тунг үүгээр хийж байгааг УОК-ын хэвлэлийн төлөөлөгч Ц.Ганзориг мэдээлсэн.
Дараагийн ээлжийн АстраЗенека вакцин өнөөдөр 22:59 цагт Монголд буух бөгөөд өмнөх хүлээн авсан вакцинаар хоёр дахь тунг хийж байгаа юм. Өөрөөр хэлбэл, нэг удаа ирсэн АстраЗенека вакциныг хоёр дахь тунд ашиглаж байгаа бөгөөд нэр өөрчлөгдөөгүй гэсэн үг.
Хугацаа нь дууссан
Зурагт харуулсан гурван тооны тухайд нэгт нь вакцины лот буюу серийн дугаар, хоёрт үйлдвэрлэсэн огноо, гуравт дуусах хугацааг байрладаг болохыг Эрүүл мэндийн яамнаас мэдээлсэн. Зурагт гурав дахь хэсэг нь харагдахгүй байгаа бөгөөд хоёрт байгаа 2020 он гэдэг нь үйлдвэрлэсэн огноог харуулжээ.
Дээрх мэдээллийг нягтлахад худал болох нь үүгээр нотлогдлоо.
НҮБ-ын Хүүхдийн Сангийн дэмжлэгтэйгээр нягтлав.
