Баримтыг нягтлагч олон улсын анхны санаачлагч Poynter институт цар тахлын үед олон нийтийн сүлжээнд гарч байгаа ташаа мэдээллийг нягталж, олон нийтэд хүргэх ажлыг түүчээлж буй.
Өнгөрсөн хугацаанд олон нийтэд ташаа мэдээлэл хүргэж ирсэн АНУ-ын подкастын хөтлөгч уучлалт гуйсан талаар Poynter 2022.02.01-нд мэдээлснийг хүргэе.
Тодруулбал, хөтөлбөртөө КОВИД-19-ийн талаарх ташаа мэдээлэл түгээгчдийг оролцуулж байснаасаа болж гутамшигтай байдалд орсон Америкийн нэртэй подкаст хөтлөгч Жо Роган шоугаа өөрчлөхөд бэлэн гэдгээ мэдэгдсэн байна. Тэрбээр салбартаа маргаантай мэргэжилтнийг хөтөлбөртөө оролцуулсан явдалдаа тулгуурлан цаашид тодорхой сэдвээр илүү их судалгаа хийж, үндсэн мэргэжилтнүүдтэй хамтарч ажиллана гэдгээ хэлжээ.
Жо Рогаыг нийгмийн эрүүл мэндэд маш ноцтой аюул учруулахуйц ташаа мэдээллийг түгээж байна хэмээн эрүүл мэндийн 270 шинжээч, эрдэмтэд Spotify-д гомдол гаргасан байна.
Учир нь Роган өнгөрсөн жил “Хэрэв чи эрүүл бөгөөд байнга дасгал хийдэг бол та залуу байна, сайн хооллож байна … энэ бол таны санаа зовох зүйл гэж би бодохгүй байна” хэмээн цар тахлын талаар хэлсэн нь ийнхүү уршиг тарьжээ.
Түүний энэ байр суурьтай Жонс Хопкинсын судлаачид санал нийлэхгүй байгаагаа илэрхийлсэн байна. АНУ-ын Халдварт өвчнөөс хянах, сэргийлэх төвөөс танилцуулснаар тус улсад өнгөрсөн зуны туршид КОВИД-19-ийн батлагдсан тохиолдлын 20-оос дээш хувь нь 30-аас доош насныхан байсан ба бусад насныхантай харьцуулахад хамгийн их халдвар тээж, тараажээ. Энэ хандлага намар хүртэл үргэлжилсэн байна. Харин Жо Роганы сонсогчдын дундаж нас 24 бөгөөд бусад залуусын санаа бодлыг хүчтэй өөрчилсөн гэж үзжээ.
Инстаграм хуудастаа оруулсан видеондоо Жо Роган “Би ташаа мэдээллийг сурталчлах гэж хичээж байгаа юм биш. Би подкастаар дамжуулж хүмүүстэй ярилцахаас өөр зүйл огт хүсээгүй. Бүх хуваарийг би өөрөө гаргадаг байсан ба бүгд зөв байсан гэж хэлэхгүй” гэж ярьсан байна.
Мөн заримдаа ташаа мэдээлэл гэж үзсэн зүйл баримт болох нь бий гэдгийг Роган хэлээд даавуун амны хаалт ямар аюулгүй болох, вакцин хийлгэсэн хүмүүс халдвар авч, халдвар тарааж чадах эсэх, хаанаас халдвар авсан талаарх ойлголтууд өөрчлөгдөж байгааг тэрээр онцолжээ.
Роган мРНХ вакцины “зохион бүтээгч” гэх доктор Роберт Малонетой хийсэн ярилцлагаараа өөрийгөө өмөөрдөг. Түүнтэй хийсэн нэг подкастынх нь үеэр Малоне “Сүүлийн үед вакцинтай холбоотой нас баралт ихсэж байгаа бөгөөд эмнэлгүүд санхүүгийн эрх ашигтай холбоотойгоор КОВИД-19-ийг өвчтөнүүдийн үхлийн шалтгаан гэж тэмдэглэх сонирхолтой байдаг” гэж Жо Робертод ярьжээ. Мөн шийдвэр гаргагчид олон нийтийг түгшээх аргыг ашигладаг тухай хэлсэн байна.
Харин дээрх гурван агуулгыг Associated press News болон ашгийн бус баримт нягтлагч PolitiFact агентлаг нягталж, ХУДАЛ болохыг нотолжээ. Харин YouTube уг ярилцлагыг нь олон нийтийн эрх ашгийг зөрчсөн гэж үзэж, бичлэг нийтлэгдсэнээс нь хойш удалгүй устгасан байна. PolitiFact Роберт Малонег тодорхойлохдоо вакцины эсрэг худал хуурмагийг сурталчлах замаар сүүлийн үед Твиттерт олон зуун мянган дагагчтай болсон гэжээ.
Жо Роган мөн хөтөлбөрөө ашиглан мРНХ-ийн вакциныг “генийн эмчилгээ” гэж худал мэдээлж, АНУ-ын Хүнс ба эмийн удирдлагын газраас гаргасан сэрэмжлүүлгийг үл харгалзан COVID-19-ийг эмчлэхэд Ивермектиний хэрэглээг сурталчилсан байна.
Хэрэв Роган хойшид энэ мэт маргаантай зочинтой ярилцахаар болбол тухайн зочныг хүн бүрд хүлээн зөвшөөрөгдөөгүй, үзэл бодлоо илэрхийлж байгаа гэдгийг сонсогчдод урьдчилан анхааруулж, ийм маргаантай үзэл бодлыг үндсэн мэргэжилтнүүдтэй хамт үргэлжлүүлнэ гэдгээ илэрхийлжээ.
НҮБ-ын Хүүхдийн Сангийн дэмжлэгтэйгээр бэлтгэв.
