Г.Занданшатарын тэргүүлсэн Засгийн газрыг огцруулах эсэх асуудлыг 2025.10.10-ны Баасан гарагт УИХ-ын Төрийн байгуулалтын байнгын хороогоор хэлэлцсэн. Энэ үеэр өмнөх Засгийн газрын тэргүүн, экс Ерөнхий сайд Л.Оюун-Эрдэнэ “МАН 2024 оны сонгуульд дэлхийд ганцаараа олонхын санал авсан. Өөр ийм эрх баригч хүчин байгаагүй” хэмээн хэлсэн.
Энэхүү мэдээллийг нягтлуулах хүсэлт ирсний дагуу нягталлаа.
Factcheck:
2024 он бол хамгийн олон сонгуультай жил байсан. Үндэсний парламентуудын дэлхийн датаг нэгтгэн гаргадаг Парламент хоорондын холбооноос гаргасан мэдээллээр 2024 онд 65 болсноос 55 нь УИХ-ын буюу парламентын сонгууль байжээ. Үүний нэг нь Монгол Улсын Их Хурлын сонгууль байв.
Манай улс анх удаа 126 гишүүнтэй парламент байгуулахаар сонгууль явуулж, МАН 68 суудал буюу 54%-аар ялалт байгуулсан ба энэ нь нийт сонгогчдын 35%-ийн санал юм.
Эх сурвалж: iKon.mn
Бусад орны зарим жишээг харвал
Тухайлбал, Малдивын Парламент 93 суудалтай бөгөөд Ардын үндэсний конгресс нам нь 66 суудал буюу сонгогчдынхоо 47.48%-ийн саналыг авснаар ялалт байгуулж дахин эрх барих болсон байна.
Эль Сальвадорт эрх баригч Nuevas Ideas нам 2024 оны сонгуулиар ассамблейн 60-аас 54 суудал авч үнэмлэхүй олонхоо хадгалсан байна.
Энэ мэт олон оронд болсон парламентын сонгуульд үнэмлэхүй олонхын саналаар сонгогдсон намууд байна. Тиймээс экс Ерөнхий сайд Л.Оюун-Эрдэнийн хэлсэн үг ХУДАЛ байна.
Эх сурвалжууд:
- Парламент хоорондын холбоо
- iKon.mn
- BBC news
- Reuters
- Africanews
