УИХ-ын гишүүн асан Ц.Оюунгэрэл твиттер хуудаснаа “Эмэгтэйчүүд нэгээс дээш хүүхэдтэй бол 50 насандаа тэтгэвэрт гарах нь…” гэсэн гарчиг бүхий мэдээллийг шэйрлэж, “Энэ мэдээ үнэн бол Монголоо Грекийн замаар дампууруулахаар шийдэж дээ, ЗГ. Грек улс тэтгэвэрийн насаа багасгаад хэдхэн жилийн дотор бүрэн дампуурч, өрөө дарахын тулд хэдэн арлаа зарсан байдаг” хэмээжээ.
Энэхүү жиргээний мөрөөр мэдээллийг нягтлуулах хүсэлт ирсний дагуу дээрх мэдээллийг нягталлаа.
Уг мэдээ reaction.mn нэртэй сайтад 2021 оны 10-р сарын 31-ний өдөр нийтлэгджээ. Мэдээллийг 2021 оны 11-р сарын 22-ны өдрийн байдлаар 7834 хүн үзсэн гэх мэдээллийг ил харуулж байна. Мэдээллийг бичсэн сэтгүүлчийн нэр байхгүй.
Мэдээллийн агуулгыг үзвэл “Эмэгтэйчүүд хэдэн хүүхэд төрүүлсэн байхаас үл хамааран эрт тэтгэвэрт гарах боломжийг олгох хуулийн талаар зөвлөлдлөө. Хэрэв огт хүүхэд төрүүлээгүй бол үрчилж авсан хүүхдийг мөн тооцно. Нэг болон түүнээс дээш хүүхэдтэй эмэгтэй сайн дураараа 50 насанд тэтгэвэрт гарах эрхтэй болно. Хэрэв улсад ажилласан жил 20-с дээш жил байх шаардлагатай. Хэрэв сайн дураараа нийгмийн даатгал төлж байсан иргэдийг хэдэн жил төлснөөс нь хамаарна. Малчин болон хувиараа бизнес эрхлэгчид хүнд нөхцөлд ажиллаж байснаас хамаарч тэтгэвэр тогтоолгоно. Малчин эмэгтэйчүүд нөхөн төлбөр төлөөд ажилласан 1 жилийг 1.5 жилээр бодож тэтгэвэр олгоно. Хэрэв батлан хамгаалах, цэрэг цагдаа зэрэг хүчний байгууллагад ажилласан бол тухайн байгууллага шийднэ. Нийгмийн даатгал жил алдалгүй төлж явсан иргэнд нэмэлт жилийн тэтгэвэр бодно. Хэрэв хүүхэд төрүүлээгүй болон өргөж аваагүй эмэгтэйчүүд хүүхдэд ээлтэй үйл ажиллагаа явуулсан эсэхээс хамаарна. Хэрэв энэ хуулийн заалтыг бүх заалтыг бүх нийтээр мөрдвөл эдгээр хүмүүст зориулж гарах эрт гарах боломжийн талаар судална. Улсад жил өнжөөгүй ажиллаж байгаа эмэгтэйчүүдэд завсардсан жил байхгүй бол улсаас нэмэлтээр тэтгэмж өгнө” гэсэн байна.
УИХ-ын 2021 оны намрын ээлжит чуулганаар нийт 72 хууль, тогтоолын төсөл хэлэлцэхээр тогтоолын төслийг баталсан.
Эдгээрт нийгмийн даатгалтай холбоотой
Нийгмийн даатгалын ерөнхий хуулийн төсөл /Шинэчилсэн найруулга/;
Нийгмийн даатгалын сангаас олгох тэтгэврийн тухай хуулийн төсөл /Шинэчилсэн найруулга/;
Нийгмийн даатгалын сангаас олгох үйлдвэрлэлийн осол, мэргэжлээс шалтгаалсан өвчний тэтгэвэр, тэтгэмж, төлбөрийн тухай хуулийн төсөл /Шинэчилсэн найруулга/;
Нийгмийн халамжийн тухай хуулийн төсөл /Шинэчилсэн найруулга/ гэсэн хуулийн төслүүд багтсан байна.Эдгээр хуулийн төслүүдэд нэгээс дээш хүүхэдтэй эмэгтэйчүүдийг 50 наснаас тэтгэвэрт гарч болох талаар заалт байхгүй байна.
Тухайлбал, Нийгмийн даатгалын сангаас олгох тэтгэврийн тухай хуулийн төсөл нь тэтгэмжийн болон ажилгүйдлийн даатгалд шимтгэл төлсөн даатгуулагчид тэтгэмж олгох, эрх үүсэх нөхцөл, хэмжээ, хугацаа, ажлын байрыг тогтвортой хадгалсан ажил олгогчид шимтгэлийн хөнгөлөлт үзүүлэхтэй холбогдсон харилцааг зохицуулахад оршино гэжээ.
Харин Нийгмийн даатгалын ерөнхий хуулийн төслийн зорилт нь нийгмийн даатгалын төрөл, хэлбэр, хамрах хүрээг тогтоох, Монгол Улсын иргэн, гадаадын иргэн, харьяалалгүй хүн нийгмийн даатгалд даатгуулах, даатгуулагчийн санхүүгийн эрсдэлийг хуваалцах зорилгоор нийгмийн даатгалын сан бүрдүүлэх, хуваарилах, зарцуулах, гүйцэтгэлийг тайлагнах, хяналт тавих, нийгмийн даатгалын үйл ажиллагаа, нийгмийн даатгалын байгууллагын эрх, үүргийг тодорхойлох харилцааг зохицуулахад оршиж байгаа бөгөөд мөн л 50 наснаас тэтгэвэрт гаргах зохицуулалт байхгүй.
Өөрөөр хэлбэл дээрх мэдээлэлд өгүүлсэн заалт бүхий хуулийн төслийг хэлэлцээгүй. Дээрх мэдээлэл худал байна.
Мөн хөдөлмөр нийгмийн хамгааллын яамнаас энэ талаар тодруулахад “нэгээс дээш хүүхэд гарсан эмэгтэйн тэтгэврийн насыг 50 болгох заалт бүхий хуулийн төсөл өргөн бариагүй” гэлээ.
Одоо хүчин төгөлдөр мөрдөж буй хуулиар 4 ба түүнээс дээш хүүхэд төрүүлж, өсгөсөн эх 20 жил шимтгэл төлсөн бол тэтгэвэрт гарах насыг өөрийн хүсэлтээр 50 байх боломжтой байгаа юм.
