Долдугаар сарын 19-нд Munkhbayar Ch нэртэй Фэйсбүүк хэрэглэгч “Ахиад л Синофарм. Энэ вакцинаас болоод бараг бүгд өвдлөө, уушги, амьсгалын системд сэв суулаа. Ахиад ингэж өвдвөл үхэхэд бэлэн болцгоолоо. Одоо хүүхдүүдийн ээлж үү? Тэдний балчир бага бие бялдар яаж давж гарах вэ? Эрсдэлтэй тул хүүхдүүдэд Синофарм хийхгүй гэсэн яасан бэ? Хятадын ЭМЯ-тай илүү хамтын ажиллагаагаа өргөтгөнө гээд байсан нь энэ юм байж л дээ. Хятад өөрийн үйлдвэрлэсэн бүх вакцинаасаа татгалзчихсан шүү дээ, гадаадын вакцин авч хийж байгаа шүү дээ. Хятадын хаягдлыг дэлхийд байхгүй өндөр үнээр аваад л байдаг, аваад л байдаг, төлбөрөө хийнэ гээд гуравдагч талаас зээл аваад л байдаг. Монголчууд бид одоо юу болчихсон юм бэ? Хүн юм уу, туршлагын хулгана юм уу бид?” хэмээх пост оруулжээ.
Уг постыг 153 хүн түгээж, 255 хүн лайк дарсан байна. Бид уг постын агуулгыг нягталлаа.
FactСheck:
Хятад өөрийн үйлдвэрлэсэн бүх вакцинаасаа татгалзчихсан – ТӨӨРӨГДҮҮЛСЭН
Хятад улс КОВИД-19 вирусийн эсрэг дотооддоо үйлдвэрлэсэн таван төрлийн идэвхгүйжүүлсэн вакцины хэрэглээг баталсан байсан бол энэ тоо долоо болжээ. Тус улс хүн амын дийлэнх нь Синофарм болон Синовак үйлдвэрийн вакциныг тариулж байна.
Одоогийн байдлаар 1.4 тэрбум хүн амынхаа 40 гаруй хувийг бүрэн дархлаажуулалтад хамруулжээ. Мөн энэ сард 3-17 насны хүүхдүүдэд Синовак болон Синофарм үйлдвэрийн вакцин тарих шийдвэр гаргасан байна. Тус улс аравдугаар сарын сүүлээр 12-17 насны бүх хүүхэд болон энэ жилийн сүүл гэхэд хүн амынхаа 70 хувийг дархлаажуулалтад хамруулах төлөвлөгөөтэй ажиллаж байна.
Хятад гадаадын вакцин авч хийж байгаа – ТАШАА
Хятад улс одоогийн байдлаар Хятадын Fosun Pharma болон Германы BioNTech-ийн хамтран гаргасан mRNA вакциныг дотооддоо хэрэглэх талаар судалж байгаа бөгөөд эцсийн шийд гараагүй байна.
Синовак болон Синофарм үйлдвэрийн идэвхгүйжүүлсэн вакцины үр нөлөө 50-80% байгаа нь mRNA вакцинтай харьцуулахад сул бөгөөд тус улсын эрх баригчид дотооддоо үйлдвэрлэсэн идэвхгүйжүүлсэн вакцины үйлчлэлийг нэмэгдүүлэх зорилгоор mRNA вакцины нэг тунг нэмэлтээр тарихаар төлөвлөж байгаа аж. Хэрэв тус улсын засгийн газар Fosun Pharma болон Германы BioNTech-ийн хамтран гаргасан mRNA вакциныг дотооддоо хэрэглэх шийдвэр гаргавал Хятадад зөвшөөрөгдсөн анхны гадаад вакцин болох юм.
Эх сурвалж:
- https://www.reuters.com/business/healthcare-pharmaceuticals/sinopharm-units-covid-vaccine-secures-approval-use-minors-china-2021-06-11/
- https://www.reuters.com/world/china/china-start-giving-covid-19-shots-teenagers-this-month-2021-07-14/
- https://www.wsj.com/articles/covid-19-vaccines-are-becoming-mandatory-in-parts-of-china-11626259091
- https://graphics.reuters.com/world-coronavirus-tracker-and-maps/countries-and-territories/china/
- https://edition.cnn.com/2021/07/15/china/vaccine-china-restrictions-zhejiang-jiangxi-intl-hnk/index.html
- https://www.globaltimes.cn/page/202106/1225877.shtml
- https://asia.nikkei.com/Spotlight/Caixin/China-to-use-BioNTech-vaccine-as-booster-shot-sources-say
Нягталсан: А.Одонтуяа
НҮБ-ын Хүүхдийн Сангийн дэмжлэгтэйгээр нягтлав.
