Фэйсбүүкт Anna Sue гэх хаягнаас “С.Одонтуяа: Хоёр эхнэртэй болох асуудалаар дахин санал оруулах хэрэгтэй. Учир нь??” гэх гарчигтай мэдээг шэйрлэжээ. Уг мэдээлэлд 96 хүн хариу үйлдэл үзүүлж, 11 хүн хуваалцаж, 45 хүн сэтгэгдэл бичжээ.
Уг мэдээнд “Гэр бүлийн тухай хуулийн 4.2.2.Монгол Улсад эрэгтэй хүн хууль ёсны нэг эхнэр эмэгтэй хүн хууль ёсны нэг нөхөртэй байна гэж заасан. Сүүлийн жилүүдэд дээрх зүйл заалтыг өөрчлөх тухай асуудал байсхийгээд яригдах болсон. Тодруулбал эрэгтэй хүн албан ёсны хоёр эхнэртэй байхаар хуульчлах ёстой хэмээх яриа цахим ертөнцөд яригдаж байна. Тэр ч бүү хэл эрчүүд энэ талаар санал оруулах болсон гэнэ. Энэ тухайд УИХ-ын гишүүн С.Одонтуяа Гэр бүлийн тухай хуульд яг үнэндээ хоёр эхнэртэй болох санал эрчүүдээс их ирж байгаа гээд бод доо хэмээн жиргэсэн байна. Ямартай ч хоёр эхнэртэй болохыг хуульчлах хүсэлтэй эрчүүд ийн С.Одонтуяа гишүүнд хандаж саналаа өгч байгаа гэнэ шүү” гэжээ.
Бид энэхүү мэдээллийг нягталлаа.
“Гэр бүлийн тухай хуулийн 4.2.2.Монгол Улсад эрэгтэй хүн хууль ёсны нэг эхнэр эмэгтэй хүн хууль ёсны нэг нөхөртэй байна гэж заасан”
Factcheck:
Гэр бүлийн тухай хуулийн 4.2.2 гэсэн заалт байхгүй бөгөөд 4.2 дахь заалтад “Иргэнийг гэрлэхэд нь үндэс, угсаа, хэл, арьсны өнгө, шашин шүтлэгээр ялгаварлан гадуурхахыг хориглоно” хэмээн заажээ. Өөрөөр хэлбэл Монгол Улсад эрэгтэй хүн хууль ёсны нэг эхнэр эмэгтэй хүн хууль ёсны нэг нөхөртэй байна гэж заасан гэдэг нь худал болохыг хуулийн нэгдсэн портал legalinfo.mn-ээс харж болно.
“Сүүлийн жилүүдэд дээрх зүйл заалтыг өөрчлөх тухай асуудал байсхийгээд яригдах болсон. Тодруулбал эрэгтэй хүн албан ёсны хоёр эхнэртэй байхаар хуульчлах ёстой хэмээх яриа цахим ертөнцөд яригдаж байна”
Factcheck:
Гэр бүлийн тухай хуульд нэмэлт, өөрчлөлт оруулах хуулийн төслийг өргөн барьсан хэдий ч тухай төсөлд эрэгтэй хүн албан ёсны хоёр эхнэртэй байх талаар тусгаагүй. Хуулийн төслийг ЭНД-ээс үзэх боломжтой.
“Энэ тухайд УИХ-ын гишүүн С.Одонтуяа Гэр бүлийн тухай хуульд яг үнэндээ хоёр эхнэртэй болох санал эрчүүдээс их ирж байгаа гээд бод доо хэмээн жиргэсэн байна. Ямартай ч хоёр эхнэртэй болохыг хуульчлах хүсэлтэй эрчүүд ийн С.Одонтуяа гишүүнд хандаж саналаа өгч байгаа гэнэ шүү”
Factcheck:
Уг мэдээ 2021 оны хоёрдугаар сарын 18-ны өдөр нийтлэгдсэн бөгөөд УИХ-ын гишүүн С.Одонтуяагийн жиргээний тухайд 2016 онд УИХ-ын гишүүнээр ажиллаж байхдаа Гэр бүлийн тухай хуулийн төслийг хэлэлцэж байх үед оруулсан бөгөөд тухайн үедээ нэлээд маргаан дэгдээж байсан юм. Тодруулбал, уг мэдээлэл нь цаг хугацааны хувьд өнгөрсөн бөгөөд үүнийг одоо мэтээр уншигчдыг төөрөгдүүлсэн байна.
