Miniih-Минийх нэртэй фэйсбүүк хуудсаар өнөөдөр “Үзвэр үйлчилгээ, амралтын газар, баар ресторанууд нээгдлээ” гэсэн гарчигтай kaka.mn гэсэн веб хуудсын мэдээг хуваалцжээ.
Энэхүү мэдээллийг нягталлаа.
Miniih-Минийх нэртэй фэйсбүүк хуудсаар нийтэлсэн уг мэдээлэлд 66 хүн хариу үйлдэл үзүүлж, 60 хүн сэтгэгдэл бичиж, 16 хүн хуваалцжээ. Хуваалцсан хүмүүсийн постыг харвал мэдээлэлд итгэсэн нь дийлэнх байв.
Тухайн мэдээллийн линкээр дарж орвол “Цахилгаан бараа, тавилга, гар утасны төвлөрсөн худалдаа, түргэн үйлчилгээний цэг, цанын баазын үйлчилгээг нээлээ” гэсэн гарчигтай мэдээ байх бөгөөд Нийслэлийн Засаг даргын Тамгын газрын нэгдүгээр сарын 16-ны өдөр гаргасан шийдвэрийг нийтэлсэн байв.
Уг мэдээлэлд үзвэр үйлчилгээ, амралтын газар, баар ресторанууд нээх талаар дурдаагүй бөгөөд гарчиг болон мэдээ агуулгын хувьд зөрөлдөж, төөрөгдүүлж байна.
Нийслэлийн Засаг дарга Д.Сумъяабазар бямба гарагт өгсөн мэдээлэлдээ цахилгаан бараа, тавилга, гар утасны төвлөрсөн худалдаа, түргэн үйлчилгээний цэг, цанын баазын үйлчилгээг нээх боловч дараах салбарын ААН-үүд хаалттай хэвээр байна гэдгийг мэдээлсэн. Үүнд,
1. Бүх төрлийн хувцас, гэр ахуйн бараа, бөс бараа, гоо сайхны бараа, тоглоом/
2. Олон нийтийг хамарсан хурал, жагсаал, цуглаан, аялал зугаалга, тэмцээн уралдаан, хурим найр, цайллага, хүлээн авалт
3. Бүх төрлийн баар
4. Өргөтгөсөн болон үзэсгэлэн худалдаа
5. Цахим болон бүх төрлийн тоглоомын үйлчилгээ
6. Спортын арга хэмжээ /заал, фитнес, бүжиг, иогийн клуб/
7. Саун, бассейн
8. Шашны зан үйл /гандан, сүм хийд, мөргөлийн газрууд/
9. Урлаг соёл, үзвэр үйлчилгээ
10. Үсчин, гоо сайхан, хумс засал
11. Бариа засал, массажны газар, алжаал тайлах төв
12. Амралт, жуулчны бааз, зочид буудал, дэн буудал
13. Нийтийн халуун ус
14. 5-аас дээш хүнтэй танхимын болон үйлдвэрлэлийн сургалт багтаж байгаа юм.
Өөрөөр хэлбэл дээрх мэдээлэл худал гарчгаар иргэдийг төөрөгдүүлсэн байна.
