“Эрдэмтэн Ханс Вернер Зин: Оюутолгойн гэрээ бол зууны ч биш, Мянганы шилдэг луйвар” гэсэн гарчигтай мэдээлэл Medee.mn мэдээллийн сайтад 2019 оны арваннэгдүгээр сарын 28-нд нийтлэгджээ.
Жил гаруй өмнө нийтлэгдсэн энэхүү мэдээлэлд ““Оюутолгойн гэрээ бол Монголын ч биш, бүр дэлхийн түүхэнд гарсан, зууны ч биш Мянганы шилдэг луйвар” гэж дэлхийн эдийн засгийн томоохон мэргэжилтэн, Европын шилдэг 10 эрдэмтний нэг Ханс Вернер Зин халаглан ярьж байна” гээд “Тэрбээр монголчуудыг мэдээсэй гэж үнэхээр хүсч байна хэмээн өөрийн санал бодлоо хуваалцлаа” гэжээ” хэмээн бичсэнийг нь өнөөдөр олон нийтийн сүлжээнд иргэд идэвхтэй хуваалцаж байна.
Тэгвэл уг мэдээлэлд дурдагдсан эшлэлийн эзэн гэгдэж буй профессор Ханс Вернер Синн ийм зүйл яриагүй гэдгээ өөрийн албан ёсны цахим хуудастаа мэдэгджээ.
Тэрбээр “Энэ текстийг Google дээр автоматаар хөрвүүлж үзлээ. Энэ текст минийх биш бөгөөд миний бодлыг тусгаагүй байгааг баталж чадна. Хэрэв хэн нэгэн энэ яриаг надаас авсан гэж мэдэгдвэл тэр хүн худал мэдээлэл түгээж байна. Үнэндээ би хэзээ ч фэйсбүүктээ мэдэгдэл хийж байгаагүй, тэр тусмаа Монголын талаар” гэжээ.
