Цахим орчинд цахилгааны мөнгийг тэглээгүй, өмнөх онтой харьцуулан, илүү төлбөрийг нь тэглэж байгаа талаар мэдээлэл гарчээ.

Тодруулбал, твиттер хуудсанд Амараа.Б хаягтай хэрэглэгч “УБЦТСХК-ийн тамхины цэг дээрээс: Тог тэглээгүй. Өмнөх оныхтой нь харьцуулалт хийгээд илүү гарсан тогны мөнгийг нь тэглэж байгаа юм байна. Та 2019 оны 12 сард 55000 төлжээ, 2020 оны 12 сард 65000 гарчээ УЛС зөрүү 10000-ыг тэглэж #ТА 55000 -аа төлнө. Ийм л байна даа. RT” хэмээн жиргэжээ.

Түүнийг жиргээг 116 хүн хуваалцжээ.

Энэхүү мэдээллийг нягталж үзлээ.

Арванхоёрдугаар сарын 13-ны өдөр цар тахалтай холбоотой эдийн засгийн хүндрэлийг даван туулахад иргэд, ААН-д дэмжлэг үзүүлэхээр цахилгаан, эрчим хүч, ус, дулаан, ус тогны мөнгийг төрөөс даахаар болсон.

Харин энэхүү шийдвэрийн холбогдох журмыг арванхоёрдугаар сарын 16-ны өдөр Засгийн газрын ээлжит хуралдаанаар хэлэлцэн баталсан юм.

“Цахилгаан, дулааны эрчим хүч, дулааны уурын хангамж, хэрэглээг зохицуулах түр журам”-ыг баталж хэрэглэгч, цахилгаан, дулаан үйлдвэрлэгчийн үүргийг тодорхой зааж өгсөн. Энэхүү журамд хэрэглэгчийн өнгөрсөн оны мөн үеийн цахилгаан, дулааны хэрэглээтэй тэнцэх хэмжээний зардлыг төр даана, үүнээс хэтэрсэн бол хэрэглэгч өөрөө хариуцахаар зааж өгчээ.

Энэ талаар Засгийн газрын албан ёсны цахим хаягт дараах мэдээллийг оруулсан байна.

Салбарын яам мөн ийнхүү мэдээлж байсан байна.

Мөн журмын “4.6. Эрчим хүчний эх үүсвэр болон шугам сүлжээний техникийн хүчин чадлын боломжит хэмжээтэй уялдуулан төлбөрийг төр хариуцах цахилгаан, дулааны эрчим хүч, дулааны уурын хэмжээг өмнөх оны мен үеийн хэрэглээнээс хэтрүүлэхгүй байхаар тооцно. Хэтэрсэн эрчим хүчний төлбөрийг одоогийн мөрдөгдөж буй тарифаар тооцож хэрэглэгч өөрөө төлнө” хэмээн заасан байна.

Өөрөөр хэлбэл, илүү гарсан төлбөрийг тэглэх бус өмнөх жилийн мөн үеийнхтэй ижил төлбөрийг тэглэж байгаа бөгөөд дээрх мэдээлэл ташаа болох нь дээрх баримтуудаар нотлогдож байна.

Нягталсан Ц.Тамир