Монгол Улсын Ерөнхийлөгч асан Н.Энхбаярын хүү Э.Батшугар Ерөнхийлөгч Х.Баттулгын зөвлөхөөр ажиллах болсон тухай мэдээлэл гараад байгаа юм.
Бид энэ мэдээллийн үнэн худлыг нягтлах зорилгоор Э.Батшугараас тодруулах гэж оролдсон боловч хариу өгсөнгүй.
Харин Ерөнхийлөгчийн Тамгын газрын Хэвлэл мэдээллийн албанаас тодруулахад уг мэдээллийг бүрэн үгүйсгэлээ. Тиймээс Ерөнхийлөгчийн зөвлөхөөр томилогдсон гэдэг нь ташаа мэдээлэл ажээ.
Одоогоор уг хуурамч мэдээллийг 24 tsag.mn болон eagle.mn гэх мэт сайтууд олон нийтэд түгээгээд байна.
Нэмэлт засвар:
Бидний нийтлэл гарснаас 4 цагийн дараа буюу 2020 оны 9 дүгээр сарын 1-ний өдрийн оройн 20:00 цагийн орчимд Э.Батшугар өөрийн албан ёсны фейсбүүк хуудастаа мэдэгдэл оруулав. Мэдэгдэлд “Энэхүү мэдээллийн талаар албан ёсоор надад мэдэгдсэн зүйл байхгүй бас худал болохыг өөрийн албан ёсны Фэйсбүүк хуудсаар дамжуулан мэдэгдэж байна. Энхбаярын БАТШУГАР 2020.09.01” гэжээ.
Нягталсан: Fact Check Mongolia – Р.Адъяасүрэн (gogo.mn), Р.Оюунцэцэг (ikon.mn)
