Цахим орчинд “Гүүрээ засаач ээ, нурлаа” гэсэн тайлбартай бичлэг цацагдсан. Уг бичлэгт том оврын машин дөрвөн эгнээ, хоёр урсгал бүхий замаар өнгөрөхөд гүүрний залгаас хэсэг хөдөлж буй харагдаж байгаа юм.
Tiktok аппликэйшн дээр erbol727 гэсэн хаяг бүхий хэрэглэгчийн хийсэн бичлэгийг твиттер хуудаснаа UB_Mongolian гэх хаягтай хэрэглэгч “Гүүрээ засаачээ!!! Нурлаашдээ…” гэсэн тайлбартай оруулжээ.
Түүний мэдээллийг хүмүүс цааш нь түгээж, Монголд байдаг гүүр мэтээр ойлгожээ. Тэгвэл уг мэдээллийг нягтлахад гүүр Монголд биш болох нь тогтоогдлоо.
Энэхүү бичлэгийг оруулсан erbol727 хаяг нь Казах хүнийх бөгөөд аравдугаар сарын 13-ны өдөр бичлэгийг оруулахдаа #Казахстан гэсэн хаштагтай оруулсан байна. Мөн бичлэгт оросоор ярьж байгаа юм. Түүнээс гадна бичлэг дэх гүүр нь давхар гүүр бөгөөд дөрвөн эгнээ бүхий хоёр урсгалтай харагдаж байгаа нь Монголд биш гэдгийг нотолж байгаа юм.
