Өчигдөр буюу 2020 оны арваннэгдүгээр сарын 16-ны өдөр Улсын онцгой комиссын хуралдааны дараа Засгийн газрын албан ёсны мэдээллийг дамжуулдаг Zasag.mn сайтад “Маргаашаас хүүхдийн 100 мянган төгрөгийг шилжүүлж эхэлнэ” гэсэн мэдээлэл тавигдсан юм.
Харин өнөөдөр буюу арваннэгдүгээр сарын 17-ны өдрийн 14:00 цагт УОК-ын ээлжит хурлын дараа мэдээлэл хийх үеэр Засгийн газрын Хэвлэл мэдээлэлтэй харилцах хэлтсийн дарга Ц.Ганзориг “Өнөөдөр гэхэд 1,179,000 хүүхдэд хүүхдийн 100 мянган төгрөг шилжсэн. 1.2 сая хүүхэд хүүхдийн мөнгөө дансаар авдаг, ихэвчлэн бүгд данстай” гэсэн мэдээллийг өгсөн юм.
Бичлэгийн 16:00-17:40 хүртэл үзнэ үү.
Гэвч үүний дараа дахин ЗГХМХХ-ээс “Хүүхдийн 100 мянган төгрөгийг энэ сарын 20-нд шилжүүлнэ. Хүүхдийн мөнгийг өнөөдрөөс иргэдийн данс руу оруулахаар Хөдөлмөр нийгмийн хамгааллын яам ажиллаж байгаа ч данстай, дансгүйгээр зохион байгуулж, олон банкаар дамжиж байгаа учраас энэ сарын 20-нд оруулахаар болсон” гэсэн залруулгыг гаргасан юм.
Мөн Монголбанкны хэвлэлийн төлөөлөгч Д.Оргил “Нэг буруу, ташаа мэдээлэл яваад байна аа. Хүүхдийн мөнгө олголтыг өнөөдөр хийх байсан ч банкны салбараас болоод хойшиллоо гэдэг нь ташаа бөгөөд яг одоогийн байдлаар Төрийн сангаас 1 төгрөгийн ч гүйлгээ орж ирээгүй байна. Хэрвээ гүйлгээ орж ирвэл Монголбанк 5 минутын дотор хүн бүрийн данс руу шилжүүлэх бүрэн боломжтой. Та бүхэн түгээж өгч, иргэдэд үүссэн ташаа ойлголтыг залруулж өгнө үү” гэсэн тайлбарыг мөн оруулжээ.
Иргэд ч мөн хүүхдийн мөнгө шилжүүлсэн хэмээсэн атал дансанд нь мөнгө орж ирээгүй талаар хэлж байна.
Өөрөөр хэлбэл, 11 сарын 17-ноос эхлэн хүүхдийн 100 мянган төгрөгийг олгоно, шилжүүлж эхэлсэн хэмээн ЗГХМХХ хоёр удаа худал мэдээллийг түгээсэн байна.
