Жүрмэд Занаа гэх фэйсбүүк хэрэглэгч 2024.11.26-нд “0-30 ХОНОГТОЙД ВАКДУУЛСАН ХҮҮХДҮҮД ВАКДУУЛААГҮЙТЭЙ НЬ ХАРЬЦУУЛАХАД 10000% ИЛҮҮ ӨВЧЛӨМТГИЙ БАЙСАН.
БАГА РОБЕРТ К.” гэсэн пост нийтэлсэн байна.
Уг мэдээллийг нягталж өгөх хүсэлт ирсний дагуу нягталлаа.
Factcheck:
Түүний эх сурвалж болгон ашигласан бага Роберт Кеннедиг вакцин эсэргүүцэж байр суурь илэрхийлсэн мэтээр олон улсад ч мэдээллүүд ихээр гарч байжээ. Түүнийг АНУ-ын Ерөнхийлөгчөөр сонгогдсон Дональд Трамп Эрүүл мэнд хариуцсан нарийн бичгийн даргад нэр дэвшүүлээд байгаа бөгөөд уг албан тушаал нь АНУ-ын эрүүл мэндийн судалгаа шинжилгээ, хоол хүнсний аюулгүй байдал гээд нийгмийн эрүүл мэндийн асуудлыг хариуцах юм байна.
Роберт Ф.Кеннеди NRP-д өгсөн ярилцлагынхаа үеэр вакцинжуулалтын эсрэг биш гэдгээ хэд хэдэн удаа илэрхийлсэн бөгөөд хүүхдүүдийнхээ хамт вакцинд хамрагдсанаа ярьжээ.
Дэлхийн Эрүүл Мэндийн байгууллагаас 2024.10.07-ны өдөр нийтэлсэн мэдээлэлд хүүхдүүд вакцинд хамрагдсанаар гарсан үр дүнгийн талаар мэдээлсэн байна.
Өнгөрсөн 75 жил гаруйн хугацаанд дэлхий дахинд вакцин хийлгэсэн зуу зуун сая хүүхдүүдийн урт хугацааны дархлааны талаар судлахад вакцин хийлгээгүй хүүхдүүд өвчлөлд өртөх эрсдэл өндөртөй болох нь тогтоогджээ.
Тухайлбал, вакцин хийлгээгүй хүүхэд хөхүүл ханиадаар өвчилсөн тохиолдолд эрүүл мэндийн ноцтой хүндрэл үүсэх магадлал 20-д нэг байдаг бөгөөд үхэлд хүргэж болзошгүй гэжээ. Хэрэв вакцин хийлгээгүй хүүхэд улаанбурханаар өвчилсөн, дундаж болон түүнээс дээш орлоготой улсад байгаа бол нас барах магадлал 500-д нэг гэсэн тооцооллыг гаргасан байна.
Вакцины үр дүнд жил бүр 4 сая хүүхэд үхлээс аврагдаж байгаа бөгөөд өнгөрсөн 50 жилд нийт 150 хүүхэд халдварт өвчний улмаас үхэх аюулаас сэргийлжээ.
Иймд дээрх пост нь олон нийтийг төөрөгдүүлсэн ХУДАЛ агуулга байна.
Аливаа мэдээллийг албан ёсны эх сурвалжаас авч, нягталж байхыг Factcheck.mn сануулсаар байна.
Эх сурвалжууд:
- NRP сайт
- BBC
- ДЭМБ
- НҮБ-ын Хүүхдийн сан
