Улсын онцгой комисс – УОК нэртэй, 102,1к хэрэглэгч бүхий фэйсбүүк группт өнөөдөр “Ковидын халдвар Манайд 2019 оны 11 сард орж ирсэн гэдэг нь нотлогджээ” гэх мэдээллийг хуваалцжээ.
Дөрвөн цагийн хугацаанд уг мэдээлэлд 240 хүн хариу үйлдэл үзүүлж, 225 хүн сэтгэгдлээ бичиж, 66 хүн хуваалцсан байна. Сэтгэгдэл бичсэн хүмүүс дунд уг мэдээллийг үнэн байх гэсэн байр суурь нэлээд байна.
Тиймээс бид энэхүү мэдээллийг нягталлаа.
Уг мэдээллийн агуулгыг үзэхээр линк дээр дарахад мэдээллийг унших боломжгүй буюу хайлт илэрцгүй гэж байна.
Тиймээс нийтэлсэн gerbul.life цахим хаягт хандахад Харилцаа холбооны зохицуулах газраас зөрчилтэй хэмээн хаагджээ. Өөрөөр хэлбэл уг сайт нь зөрчил гарган хандалтаа хаалгасан сайтуудын тоонд орж байна. Иймээс доторх агуулгыг харах боломжгүй байна.
Factcheck:
Харагдаж буй гарчигт байгаа мэдээллийг нягталбал, манай улсын хувьд анхны зөөвөрлөгдсөн тохиолдол 2020 оны гуравдугаар сарын 10-нд бүртгэгдэж байсан бол дотоодын анхны халдварыг 2020 оны 11-р сарын 10-нд бүртгэснийг Халдварт өвчин судлалын үндэсний төвөөс мэдээлж байв.
Харин дэлхий дахинд буюу Дэлхийн эрүүл мэндийн байгууллагаас 2020 оны 1-р сарын 6-ны өдөр шалтгаан нь тодорхойгүй уушгины хатгалгаа өвчин бүртгэгдсэнийг ДЭМБ-аас анх мэдээлсэн.
Тодруулбал, 2020 оны нэгдүгээр сарын 3-наас БНХАУ-ын Хубэй мужийн Ухань хотод шалтгаан нь тодорхойгүй уушгины хатгалгаа өвчин бүртгэгдэж, зарим тохиолдлын биеийн байдал хүнд байгаа бөгөөд хавьтлуудыг хяналтад авсан гэдэг мэдээллийг ХӨСҮТ-ээс өгч байсан юм.
Одоогийн байдлаар манай улсад 2019 онд шинэ коронавирусийн халдвар орж ирсэн талаарх баримт, нотолгоотой зүйл үгүй. Өөрөөр хэлбэл зөрчилтэй хэмээн хаагдсан сайтад гарсан Ковидын халдвар Манайд 2019 оны 11 сард орж ирсэн гэдэг нь НОТЛОГДЖЭЭ гэсэн нь худал юм. Үүнийг нотолсон талаар албан ёсны мэдээлэл, нотолсон зүйл байхгүй юм.
