“Малайзад цоо шинэ вирус илэрчээ. Хажууд нь коронавирус зүгээр л хамрын ханиад” хэмээх постыг @SBilegsaikhan хэмээх хаягнаас жиргэжээ. Түүний жиргээг харвал Нипа гэх вирусийн талаар бичсэн байна.
Энэхүү мэдээллийг бид уншигчдын хүсэлтээр нягталлаа.
Нипа гэх вирус нь Малайзын Кампунг Сунгай Нипа гэх гтосгонд 1998 онд анх бүртгэгджээ. Ингэхдээ жимсний сарьсан багваахайнаас хүнд халдварласан бөгөөд тухайн үед 100 гаруй хүн нас барж, нэг сая гаруй гахайг алахад хүргэсэн байна. Үүнээс хойш 2008 онд Бангладешт мөн сарьсан багваахайнаас жимсээр дамжин хүнд халдварласан тохиолдол бүртгэгджээ. 2018 онд Энэтхэгийн Киралад мөн бүртгэгдсэн байна.
Нипах вирусийн халдвар нь амьтнаас хүнд халдварладаг зоонозын өвчин бөгөөд бохирдсон хоол хүнсээр эсвэл хүнээс хүнд шууд дамждаг. Халдвар авсан хүмүүст шинж тэмдэггүй (дэд) халдвараас амьсгалын замын цочмог өвчин, үхлийн аюултай энцефалит хүртэлх олон өвчин үүсгэдэг ба гахай зэрэг амьтдад хүнд өвчин үүсгэдэг ажээ. Өмнө бүртгэгдсэн тохиолдлууд нь гайхаас хүнд, хүнээс хүнд халдаж байжээ.
Одоогоор уг вирусийн эсрэг эм, вакцин гараагүй байна.
Өнөөдрийн байдлаар энэхүү вирус нь Малайзад дахин бүртгэгдээгүй байна. Тиймээс дээрх мэдээлэл нь ташаа болж байна.
Нипа вирус COVID-19-өөс аюултай эсэх тухайд:
Нипа вирусийн нас баралтын түвшинг 40-75% гэж үздэг байна. Харин COVID-19-ийнх 2.8%-тай гэж үзэж байгаа. Гэвч коронавирусийн халдвараар өнөөдөр дэлхийн 218 улс, газар нутгийн 102.6 сая хүн өвчилж, 2.2 сая хүн нас бараад байна.
