УИХ-ын сонгуульд өрсөлдөж буй нэр дэвшигчид иргэдтэй хийж буй уулзалт болон нийтэд өгч байгаа мэдээллийнхээ үеэр санаатай болон санамсаргүй ташаа мэдээлэл өгөх тохиолдол гарч байна.

Тухайлбал, АН-аас Сонгинохайрхан дүүргийн 28 дугаар тойрогт нэр дэвшиж буй О.Магнай МАН-ын өрсөлдөгч гурван нэр дэвшигчийг мэтгэлцээнд дуудаж буй талаараа мэдээлэл хийх үеэрээ сэтгүүлчийн асуултад хариулахдаа “Өөрөө өөртөө ажлын байр бий болгодог жижиг, дунд салбарын тусгай зөвшөөрлийг байхгүй болгоно гэж би хэлсэн. Үсчин, гуанз, дэлгүүр зэргийг нээхэд төрийн бүх хүнд суртлыг болъё.

Монгол Улс авлигалаараа дэлхийд 148-д явж байна. Эдийн засгийн эрх чөлөөний индексээрээ дэлхийд 150-д бичигдэж байгаа.

Тусгай зөвшөөрлийн уриа лоозон сайхан хэрнээ тэр чигээрээ авлига. Эдийн засгийн эрх чөлөө өгөх ёстой.

Гутал тосолж болохгүй байна. Дүүргээс зөвшөөрөл ав гэнэ. Дарга цэрэг танихгүй бол гуанз нээж чадахгүй байна. Гуанз нээхэд таван тусгай зүөвшөөрөл авч байна, тав” гэсэн юм.

Тэрбээр ийнхүү яриахдаа иргэдэд гурван ч ташаа мэдээлэл өгч байна.

2019 оны үнэлгээгээр Монгол Улс 35 оноо авч, дэлхийн 180 орноос 106-д эрэмбэлэгджээ. Сүүлийн таван жилийн авлигын индексийг харвал:

    2013 онд- 38 оноо буюу 176 орноос 87-р байрт,

    2014 онд- 39 оноо буюу 176 орноос 87-р байрт,

    2015 онд- 39 оноо буюу 176 орноос 87-р байрт,

    2016 онд- 38 оноо 176 орноос 87-р байрт жагсаж ирсэн бол,

    2017 онд- 36 оноо авч, 180 орноос 103 дугаар байрт буюу өмнөх жилээсээ 16 байраар огцом ухарсан байдаг,

    2018 онд- 37 оноо авч, 180 орноос 93-р байрт орж, өмнөх жилээс 10 байраар урагшилсан байна.

2019 оны арванхоёрдугаар сарын 10-ны өдөр Хүний эрх чөлөөний индексийг танилцуулах үеэр мэдээлснээр Эдийн засгийн эрх чөлөөний индексээр Монгол Улс 186 улсаас 125 дугаарт бичигдсэн байна.

Гуанз нээхэд ямар нэгэн тусгай зөвшөөрөл авахгүй. Гуанз нээхийн тулд тухайн иргэн дүүргийнхээ Мэргэжлийн хяналтын хэлтэст хандан мэдээллийн санд бүртгүүлнэ.

Дүүргийн Хүнс, худалдаа, үйлчилгээний хэлтэстэй гэрээ байгуулж, батламжаа авна.

Гааз ашиглах бол Онцгой байдлын хэлтэст мөн хандаж зөвшөөрөл авснаар үйл ажиллагаа явуулах боломжтой болно.

Харин архи, согтууруулах ундаагаар үйлчлэх тохиолдолд л тусгай зөвшөөрөл авах шаардлагатай ажээ.