Товч агуулга:
- Роберт Ф.Кеннедигийн мэдэгдэлд Pfizer компани, COVID-19 вакцин, вакцины сөрөг нөлөө болон вакцины аюулгүй байдлын нууц баримт бичгийн талаар огт дурдаагүй байна.
- Pfizer-ийн ил болсон жагсаалт нь вакцинаас үүдэлтэй нь батлагдсан өвчнүүдийн жагсаалт биш. Харин аюулгүй байдлын тандалтаар анхаарч судлах шаардлагатай эрүүл мэндийн нөхцөлүүдийг багтаажээ.
- Pfizer-ийн mRNA вакцин бүх төрлийн цусны бүлэгнэл, мэдрэлийн эмгэг, хорт хавдар, гэнэтийн үхлийг уг вакцинаас үүдэлтэй гэдэг нь баталгаагүй, нотлогдоогүй мэдээлэл байна.
Нөлөө Альянс хэмээх фэйсбүүк хаягаас “Дэлхий нийтийг цочроосон мэдээ — Албан ёсоор батлагдлаа: Pfizer компанийн COVID-19 вакцины сөрөг нөлөөний нууц жагсаалт эцэст нь ил боллоо” гэсэн постыг 2026.10.11-нд постыг нийтэлжээ. Уг постыг нягталж өгөх хүсэлт ирсний дагуу нягталлаа.
Factcheck:
Мэдээлэл хийсэн уг бичлэгийг нягталж үзвэл АНУ-ын Эрүүл мэнд, нийгмийн хамгааллын сайд Роберт Ф.Кеннеди Жр хамгийн сүүлд 2026.10.05-нд Хөдөлмөрийн яам, Сангийн яамтай хамтран тус улсын эрүүл мэндийн даатгалын компаниуд эмч, эмнэлгүүдтэй тохиролцсон үйлчилгээний үнийн мэдээллээ олон нийтэд ил тод болгох шаардлагыг чангатгасан шинэ журмыг эцэслэн баталж байгаа тухай мэдээлэл хийжээ. Энэ үеэр Роберт Ф.Кеннеди Жр Pfizer вакчин болон COVID-19 вакцины талаар огт дурдаагүй байна.
Өөрөөр хэлбэл, “2026 оны 10-р сарын 9-нд хийгдсэн мэдээллийн ил болголт нь Pfizer-ийн удаан хугацаанд нууцалж ирсэн сөрөг нөлөөний жагсаалтыг олон нийтэд танилцууллаа” гэсэн нь нотлогдсонгүй.
Харин АНУ-ын Эрүүл мэнд, нийгмийн хамгааллын яам(HHS) 2026.10.08-нд вакцины хүндрэлийн судалгаа, тайлагнал болон өвчтөний тусламж үйлчилгээг сайжруулах салбар дундын иж бүрэн арга хэмжээнүүдийг эхлүүлж байгаа талаар мэдэгдэл гаргажээ. Тодруулбал, уг мэдэгдэлд вакцин хийлгэсний дараа эрүүл мэндийн асуудал үүссэн гэж мэдээлсэн хүмүүсийг судлах зорилгоор АНУ-ын Үндэсний эрүүл мэндийн хүрээлэнгийн (NIH) дэргэд эмнэлэг байгуулах, мөн вакцины дараах хүндрэлүүдийн талаар VAERS системд мэдээлэл илгээсэн эмч нарт нөхөн төлбөр олгох санал зэрэг хэд хэдэн санаачилгыг танилцуулсан байна. Гэхдээ уг мэдэгдэлд мөн л Pfizer компани вакцинаас үүдэлтэй нь батлагдсан гаж нөлөөний жагсаалтыг нуун дарагдуулсан, эсвэл ийм жагсаалтыг аравдугаар сарын 9-нд ил болгох тухай огт дурдаагүй байна.
“Pfizer-ийн удаан хугацаанд нууцалж ирсэн сөрөг нөлөөний жагсаалтыг олон нийтэд танилцууллаа” гэсэн нь мөн олон нийтийг ТӨӨРӨГДҮҮЛСЭН мэдээлэл байна. Дээр дурдсанчлан Роберт Ф.Кеннеди Жр Pfizer вакцины талаар, жагсаалт ил болгосон тухай огт яриагүй байна.
Pfizer компанийн COVID-19 вакцины аюулгүй байдлын тайлангийн хавсралтад 1,291 нэр томьёо бүхий онцгой анхааран хянах шаардлагатай жагсаалт багтсан нь 2022 онд олон нийтэд мэдээлэгдэж байсан ба FactCheck.org, Full Fact зэрэг баримт нягтлах байгууллагууд нягтлан хүргэж байжээ. Ийнхүү нягталснаар уг жагсаалт вакцинаас үүдэлтэй нь батлагдсан өвчнүүдийн жагсаалт биш байжээ. Харин аюулгүй байдлын тандалтаар анхаарч судлах шаардлагатай эрүүл мэндийн нөхцөлүүдийг багтаасан баримт бичиг аж.
Вакцин хийлгэсний дараа тухайн хүнд илэрсэн аливаа өвчин, эмгэг нь вакцины нөлөөгөөр үүссэн гэсэн үг биш. Шалтгаант холбоог тогтоохын тулд тархвар судлалын болон бусад шинжлэх ухааны нотолгоо шаардлагатай. Pfizer-ийн mRNA вакцины дараа миокардит, перикардит ховор тохиолдож болох нь тогтоогдсон байна. Гэхдээ постод дурдсан бүх төрлийн цусны бүлэгнэл, мэдрэлийн эмгэг, хорт хавдар, гэнэтийн үхлийг уг вакцинаас үүдэлтэй гэсэн нь нотлогдоогүй баталгаагүй мэдээлэл байна.
Түүнчлэн “турбо хорт хавдар” нь анагаах ухаанд албан ёсоор хүлээн зөвшөөрөгдсөн онош биш бөгөөд COVID-19 вакцин ийм өвчин үүсгэдэг гэх нотолгоо мөн тогтоогдсонгүй.
Иймд Кеннедигийн мэдэгдлийг вакцины нууц мэдээлэл ил болсон гэх агуулгатай холбон түгээсэн нь олон нийтийг ТӨӨРӨГДҮҮЛЖЭЭ.
Эх сурвалжууд:
- АНУ-ын Эрүүл мэнд, нийгмийн хамгааллын яам
- The National Desk
- FactCheck.org
- Full Fact
