Товч агуулга
Pfizer вакцин хийлгэсний дараа үрийн шингэний чанарын зарим үзүүлэлт түр хугацаагаар буурсан нь судалгаагаар тогтоогдсон ч энэ нь нөхөн үржихүйд удаан хугацааны нөлөө үзүүлж байгааг нотлох баримт биш.
Бусад судалгаагаар Pfizer вакцин үрийн шингэний чанарт ямар ч нөлөө үзүүлээгүй байна.
Вакцин нь эмэгтэйчүүдийн нөхөн үржихүйд хор хөнөөл учруулдаг гэсэн нотолгоо байхгүй байна.
“…Pfizer-ийн mRNA вакцин нь доноруудын үрийн шингэний концентрац болон нийт хөдөлгөөний тоог түр хугацаагаар бууруулдаг нь дэлхийн хүн амыг устгах төлөвлөгөөний нэг хэсэг байсныг нотолж байна” гэсэн агуулгатай постыг жүжигчин асан Шон Уорд Инстаграм хуудастаа тавьжээ. Улмаар цахим орчинд энэхүү мэдээлэл тархаж, жиргээчид мөн цааш түгээсэн байна.
Тэгвэл уг мэдээллийг Fullfact.org-ийн баримт нягтлагчид шалгаж, бодит мэдээллийг хүргэв.
Factcheck:
Цахим сүлжээнд оруулсан уг постод эшлэл болгон оруулсан судалгааны линкийг эхлээд шалгасан байна. Судалгаагаар 220 дээж өгсөн эр бэлгийн эсийн 37 донороос хэрхэн шинжилгээ хийсэн тухай болон Pfizer вакцинд хамрагдсаны дараах үетэй нь харьцуулжээ. Ийнхүү судлахад вакцин хийлгэхээс өмнөх үеийн нэг мл үрийн шингэн дэх эр бэлгийн эсийн тоо болон хөдөлгөөн вакцин хийлгэснээс хойших 2.5-5 сарын хугацаан бага түвшинд байсан бол таван сарын дараа эргээд хэвийн түвшинд очсон байна.
Pfizer вакцины дараах системийн дархлааны хариу урвал нь эр бэлгийн эсийн концентраци болон хөдөлгөөн түр зуур буурах үндэслэлтэй шалтгаан юм гэдгийг судалгаанд дурдаад халуурахтай холбоотой өвчин нь эр бэлгийн эсийн чанарт түр зуур нөлөөлдөг болохыг олж тогтоосон бусад судалгааг онцолж, “Эр бэлгийн эсэд шууд нөлөөлөхөөс илүүтэйгээр системийн дархлааны хариу урвал нь үндэслэлтэй тайлбар гэж үзэж байна” гэжээ.
Уг судалгаагаар “Урт хугацааны төлөв байдал сайн хэвээр байгаа” гэдгийг онцлоод вакцины урт хугацааны үр нөлөөг аюулгүй гэж тэмдэглэсэн байна.
Бусад судалгаагаар Pfizer вакцин хийлгэсний дараа үрийн шингэний чанар буураагүй байна.
Түүнчлэн 37 донорыг хамарсан судалгааг бүр эрчүүдийг төлөөлөх үзүүлэлт гэж үзэх боломжгүй гэжээ.
АНУ-ын Эм, эрүүл мэндийн бүтээгдэхүүний зохицуулах агентлаг КОВИД-19-ийн вакцин хийлгэсний дараах үеийн хүндрэлийн талаарх тайланг хянаж байгаа бөгөөд сарын тэмдгийн өөрчлөлт, холбогдох шинж тэмдгүүд болон КОВИД-19 вакцинуудын хоорондын холбоо өнөөг хүртэл тогтоогдоогүй болохыг мэдэгдсэн байна.
Сарын тэмдгийн өөрчлөлт нь ихэвчлэн түр зуурын шинж чанартай байдаг бөгөөд КОВИД-19-ийн вакцин нь нөхөн үржихгүй, хүүхэд төрүүлэх чадварт нөлөөтэй гэсэн нотолгоо байхгүй болохын нэмж тайлбарлажээ.
Иймд коронавирусийн эсрэг Pfizer вакцин эр бэлгийн эсэд нөлөөлж, хүн амыг цөөлнө гэсэн мэдээлэл ХУДАЛ хэмээн Fullfact үнэллээ.
Эх сурвалжууд:
https://onlinelibrary.wiley.com/doi/10.1111/andr.13209
https://www.medrxiv.org/content/10.1101/2021.04.30.21255690v1.full
https://pubmed.ncbi.nlm.nih.gov/14507826/
https://onlinelibrary.wiley.com/doi/10.1111/andr.13209
https://onlinelibrary.wiley.com/doi/epdf/10.1111/andr.13209
НҮБ-ын Хүүхдийн сантай хамтран бэлтгэв.
