КОВИД-19-ийн эсрэг вакцин хийлгэсэн хүмүүс вакцинаас үүдэлтэй дархлалын олдмол хомсдлын нэг хэлбэрт өртөж болзошгүй гэсэн мэдээлэл олон нийтийн сүлжээнд таржээ. Тодруулбал, Их Британийн мэдээллийн хэрэгсэл болох The Expose КОВИД-19-ийн эсрэг вакцин хийлгэсэн хүмүүс вакцинаар үүсгэгдсэн ДОХ буюу “вакцинаар үүсгэгдсэн дархлалын олдмол хомсдолын хам шинж” хэлбэрээр өвчилж болно гэсэн агуулгатай мэдээллийг 2022.02.08-нд нийтэлсэн байна.
Уг нийтлэлдээ КОВИД-19-ийн эсрэг вакцин хийлгэсэн хүмүүс вакцингүй хүмүүсээс илүүтэй халдвараар өвчилж байгааг бичээд вакцин коронавирусийн халдвараас сэргийлэхгүй байгаагаас гадна хүний байгалийн дархлааны системийг муудуулж байгаа гэжээ. Тус мэдээллийн хэрэгсэл цар тахлын үед ийм агуулгыг олон давтамжтайгаар явуулж байсан бөгөөд ингэхдээ албан ёсны дата мэдээллийг хуурамч үндэслэл болгон зүй бусаар ашиглаж иржээ.
Тухайлбал, Их Британийн Эрүүлийг хамгаалах агентлаг(ЭХА)-ийн мэдээллээр гэж эш татахдаа коронавирусийн халдвар вакцингүй биш, вакцин хийлгэсэн хүмүүсийн дунд илүү өндөр байна гэдгийг үргэлж цохож ирсэн ба вакцины үр дүн хасах 183% бөгөөд халдвар авах эрсдэлийг улам нэмж байна гэж мэдээлсээр ирсэн байна.
Гэвч үнэн хэрэгтээ Их Британийн ЭХА “Вакцины үр нөлөөг үнэлэхдээ өвчлөл, хэвтэн эмчлүүлсэн болон нас барсан хүмүүсийн вакцинжуулалтын статусыг ашиглах ёсгүй. Яагаад гэвэл вакцин хийлгэсэн болон вакцин хийлгээгүй хүмүүсийн хоорондох цорын ганц ялгаа нь вакцинд хамрагдах явдал биш юм” буюу бусад олон хүчин зүйлийг авч үзэх хэрэгтэй тайлбарлаж байгаа юм.
Учир нь тус улсад эмчийн бүртгэлд байгаа нийт хүний тооноос вакцинд хамрагдсан хүмүүсийн тоог хасах замаар вакцинд хамрагдаагүй хүмүүсийн тоог тооцоолж байгаа аж. Гэвч эмчийн бүртгэлд байгаа хүмүүсийн тоо нь Их Британид вакцин хийлгэх боломжтой хүмүүсийн бодит тоог илэрхийлэхгүй юм байна. Иймд 11 дүгээр сард Үндэсний статистикийн хорооноос нь танилцуулсан хүн амын нийт тоогоор авч үзвэл вакцинд хамрагдаагүй хүн маш бага гарахыг сануулжээ.
Эдгээр шалтгааны улмаас вакцинд хамрагдсан хүмүүсийн өвчлөл өндөр мэт харагдаж болох ч энэ нь вакцин үр дүнгүй гэж үзэх үндэслэл болохгүй гэдгийг тус улсын Эрүүлийг хамгаалах агентлаг тайлбарласан байна.
Мөн сүүлийн саруудад байнга мэдээлээд байгаа, вакцинууд ДОХ-ын нэг хэлбэрийг өдөөдөг гэсэн мэдээллийг няцаажээ.
Их Британийн ЭХА-ийн вакцины тандалтын тайланд КОВИД-19-ийн эсрэг вакцины гурван тун нь Дельта хувилбарын шинж тэмдгийн өвчин, эмнэлэгт хэвтэх, нас баралтаас өндөр түвшинд хамгаалж байгааг олон судалгаагаар баталгаажуулан нэгтгэн гаргасан байна.
Омикрон хувилбарын эсрэг гурван тун нь нас баралт болон эмнэлэгт хэвтэхээс мөн өндөр хувьтай хамгаалж байгаа бол шинж тэмдгийн өвчнөөс хамгаалах нь харьцангуй бага гэж үзжээ.
Вакцинуудын үр дүн цаг хугацааны явцад суларч болох нотолгоо байгаа ч вакцинжуулалт нь КОВИД-19-ийн эсрэг хамгаалах нөлөөг бууруулахгүй гэдэг нь нотлогдсон гэсэн байна.
Тиймээс КОВИД-19-ийн эсрэг вакцин хийлгэсэн хүмүүс ДОХ-ын нэг хэлбэрт өртөж болзошгүй гэдэг мэдээлэл нь ХУДАЛ гэж үнэлжээ.
Эх сурвалжууд:
https://www.nature.com/articles/d41586-021-02532-4
https://fullfact.org/online/vaccines-aids-myocarditis/
https://fullfact.org/health/phe-ukhsa-bolsonaro/#:~:text=The%20data%20also,enough%20was%20done
НҮБ-ын Хүүхдийн сантай хамтран бэлтгэв.
