2021 оны есдүгээр сарын 12-ны өдөр xyznews24.com сайтад “Коронавирус хяналтаас гарсан тул сургууль, цэцэрлэгийн үйл ажиллагааг зогсоолоо” гэх гарчигтай мэдээлэл гарчээ.

Уг мэдээллийг 37 хүн хуваалцаж, 123 хүн хариу үйлдэл үзүүлсэн байна.

Дээрх мэдээллийг нягталлаа.

Мэдээллийн линк дээр дарж орвол “Архангай аймгийн Засаг дарга дараах захирамжийг гаргалаа: Коронавируст халдварын тохиолдол нэмэгдэж байгаатай холбогдуулан аймгийн хэмжээнд хүүхдийн цэцэрлэг, Ерөнхий боловсролын сургуулийн хичээлийг 2021 оны 10 дугаар сарын 01-ний өдрийг хүртэл хугацаанд цахимаар явуулах” гэжээ. Өөрөөр хэлбэл уг мэдээлэл нь Архангай аймагт хамааралтай мэдээлэл байгаа боловч гарчигтаа тухайлан заагаагүйгээс улсын хэмжээнд гаргасан шийдвэр мэт ойлголтыг иргэдэд төрүүлж төөрөгдүүлсэн байна.

Мөн Архангай аймгийн Засаг даргын гаргасан захирамжид халдварын тохиолдол нэмэгдэж байгаа тухай өгүүлсэн байхад хяналтаас гарсан хэмээсэн нь мөн л төөрөгдүүлжээ.

Архангай аймгийн Засаг даргын захирамжид сургалтын үйл ажиллагааг 2021 оны 10 дугаар сарын 01-ний өдрийг хүртэл цахим хэлбэрт шилжүүлсэн гэсэн атал мөн л зогсоосон хэмээн дахин төөрөгдүүлсэн байна.

Нэмж мэдээллэхэд, Боловсрол, шинжлэх ухааны сайд Л.Энх-Амгалан цаг үеийн нөхцөл байдлын талаарх мэдээллийг өнөөдөр өгсөн. Ингэхдээ халдварын тоо буурвал танхимын хичээлийг нэмэгдүүлнэ гэдгийг хэлсэн юм.

9 дүгээр сарын 10-ны өдрийн байдлаар нийт ерөнхий боловсролын 205 сургуулийн 4150 бүлгийн 86,000 сурагч танхимаар хичээллэж байна. Танхимын, танхимын бус хосолсон хэлбэрээр ерөнхий боловсролын 552 сургуулийн 17240 бүлгийн 519,179 сурагч хичээллэж байна.Халдварын тохиолдол илэрсний улмаас 245 сургуулийн 1592 бүлгийн 43351 сурагч цахим хэлбэрт шилжсэн. Үүнээс 64 сургууль, 322 бүлэг, 13240 суралцагч нь Улаанбаатар хотод байгаа аж.

9 дүгээр сарын 12-ны өдрийн байдлаар коронавируст халдвараар 0-17 насны 696 шинэ тохиолдол бүртгэгдэж, нийт 51,843 тохиолдол бүртгэгдсэн. Энэ нь нийт тохиолдлын 19,5%-ийг эзэлж байна. Тоон мэдээллээс харахад хичээлийн үйл ажиллагаа танхим, танхимын бус хэлбэрээр эхэлснээс хойш халдварын тохиолдол нэмэгдээгүй байна гэж БШУЯ-наас мэдээллээ.