"ДЭМБ 18 нас хүрээгүй байгаа хүүхдүүдийг одоохондоо вакцинжуулалтад хамруулахгүй байхыг зөвлөлөө" гэсэн постыг Benz Mercedes гэх фэйсбүүк хэрэглэгч пост оруулжээ.
Уг мэдээллийг нягталлаа.
Factcheck:
ДЭМБ-аас 2021 оны зургадугаар сарын 15-нд шинэчилсэн удирдамжид 12-15 насныханд хийсэн вакцины судалгаагаар хоёр тун хийснээс хойш 7 хоногийн дараа 95%-ийн үр дүн гарсан талаар дурдсан байна. Энэхүү судалгааны дүнд үндэслэн ДЭМБ 12-оос дээш насныхныг вакцинжуулалтад хамруулахыг зөвлөж байна. Ингэхдээ хоёр тунгийн хоорондох хугацааг 21-28 хоногт хийхийг зөвлөжээ.
Харин 12-оос доош насны хүүхдүүдийг дархлаажуулах талаар одоогоор судалгаагүй байгааг уг удирдамжид бичсэн байна.
ДЭМБ-аас 2021 оны зургадугаар сарын 22-нд шинэчилсэн зөвлөмжид дээрх өгүүлбэр байгаа буюу тус байгууллага уг мэдээллээ устгаагүй байна. Уг зөвлөмжид COVID-19-ийн эсрэг вакцинууд 18 ба түүнээс дээш насны иргэдэд аюулгүй хэмээн бичсэн байна. Харин Pfizer вакциныг 12-оос дээш насныханд тохиромжтой болохыг ДЭМБ-ын Стратегийн зөвлөх шинжээчдийн бүлэг дүгнэснийг дурджээ.
Тиймээс дээрх мэдээлэл нь ХУДАЛ буюу иргэдийг төөрөгдүүлсэн байна.
ДЭМБ маш олон судалгаа, шинжилгээнд тулгуурлаж, эрдэмтдийн үндэслэлээр хангалттай нотолгоотой гэж үзсэнээр аливаа зөвлөмжөө боловсруулж, хүргэдэг. Тухайлбал, коронавирусийн эсрэг вакциныг зөвлөхдөө дөрвөн шатны эмнэл зүйн туршилтаар гарсан үр дүнд суурилж байгаа юм. Иймээс хангалттай судалгаа хийгдэж, аюулгүй гэж үзсэний үндсэн дээр 12-оос дээш насны хүүхдүүдэд Pfizer вакциныг зөвлөсөн байна.
Уг зөвлөмжийг бүрэн эхээр нь ЭНД дарж үзнэ үү.
НҮБ-ын Хүүхдийн Сангийн дэмжлэгтэйгээр нягтлав.
