Tserenkhuu Ishtseden хэмээн фэйсбүүк хэрэглэгч “ДЭМБ Vero Cell вакциныг “зөвшөөрлөө бүртгэж авлаа гэнээ” гэсэн мэдээ цуурхал шүү! Гагцхүү онцгой нөхцөлд хэрэглэж болно, гэхдээ үр дүнгийн мэдээлэлд экспертизын групп итгэхгүй байгаа гэж Гебрейесус хэлсэн” гэсэн постыг тавдугаар сарын 8-ны өдөр нийтэлжээ.
Уг постыг 213 хүн цааш түгээж, 139 хүн сэтгэгдэл бичиж, 532 хүн лайк дарсан байна. Тэрбээр яг ийм агуулга бүхий гурван пост оруулсныг нь мөн л олон хүн цааг шэйрлэж, сэтгэгдэл бичжээ.
Уг мэдээллийг нягтлав.
“ДЭМБ Vero Cell вакциныг “зөвшөөрлөө бүртгэж авлаа гэнээ” гэсэн мэдээ цуурхал шүү!”
Factcheck: ХУДАЛ
Баасан гарагт Дэлхийн Эрүүл Мэндийн Байгууллага БНХАУ-ын төрийн өмчит “Синофарм” компанийн бүтээсэн Vero Cell буюу идэвхгүйжүүлсэн коронавирусийн вакциныг яаралтай горимд хэрэглэх зөвшөөрөл олгосон талаар мэдэгдэв.
“Гагцхүү онцгой нөхцөлд хэрэглэж болно”
Factcheck: ҮНЭН
Уг вакциныг яаралтай горимд ашиглаж болох зөвшөөрөл олгосныг дээд дурдсан. ДЭМБ өмнө нь Pfizer, AstraZeneca, Johnson & Johnson, Moderna вакцинуудад ДЭМБ зөвшөөрөл олгоод байсан юм. Эдгээр вакциныг мөн ялгаагүй яаралтай горимд ашиглаж болох зөвшөөрөл өгсөн бөгөөд КОВАКС хөтөлбөрийн хүрээнд нийлүүлж байгаа.
“Гэхдээ үр дүнгийн мэдээлэлд экспертизын групп итгэхгүй байгаа гэж Гебрейесус хэлсэн”
Factcheck: ХУДАЛ
Өнөөдрийн байдлаар дэлхий дахинд “Синофарм” үйлдвэрийн 65 сая тун вакциныг дархлаажуулалтад ашиглаад буй бөгөөд дархлаа тогтоож байгаа үр дүн 79% гэж ДЭМБ үнэлжээ.
Тэгвэл “Синофарм” үйлдвэрийн вакциныг КОВАКС хөтөлбөрийн хүрээнд ашиглах боломжтой ДЭМБ нотолжээ.
Тодруулбал, ДЭМБ-ын ерөнхий захирал Тедрос Адханом Гебрейесус “Улс орнууд энэхүү вакциныг өөрийн орны зохицуулалтыг хурдасгаж, итгэлтэйгээр ашиглаж болно” гэсэн байна.
Өөрөөр хэлбэл, Tserenkhuu Ishtseden хэмээн хэрэглэгчийн олон нийтийн сүлжээнд тавьсан мэдээлэл ХУДАЛ болох нь нотлогдож байна.
НҮБ-ын Хүүхдийн Сангийн дэмжлэгтэйгээр нягтлав.
