Eagle News фэйсбүүк пэйж хуудсаар өнөөдөр өглөө БНЭУ-аас АстраЗенека вакцин хүлээн авах явцыг шууд дамжуулан хүргэжээ. Уг мэдээллийн төгсгөлд “Өнөөдөр орой 23:00 цаг орчимд БНХАУ-аас Файзер вакцин ирнэ” гэх мэдээллийг сэтгүүлч өгчээ.
Уг мэдээллийг нягтлах хүсэлт уншигчаас ирсэн юм.
Шууд мэдээллийн төгсгөлд “Өнөөдөр орой 23:00 цаг орчимд БНХАУ-аас 300,000 тун Файзер вакцин ирнэ. БНХАУ болон БНЭУ-аас тусламжаар ирж буй вакциныг КОВАКС хөтөлбөрийн ххүрээнд тусламжаар ирж буй бөгөөд хөтөлбөрийн хүрээнд насанд хүрэгчдийн 20 хувьд хийх бол улсын төсвөөр үлдсэн 40 хувьд вакцин хийнэ” гэжээ.
Factcheck:
Манай улсын хувьд нийт дөрвөн төрлийн вакциныг вакцинжуулалтдаа ашиглана гэдгийг Засгийн газраас мэдээлсэн. Тодруулбал, АНУ, Германы хамтарсан “Файзер”, Оксфордын их сургуулийн “АстраЗенека”, Хятадын Синофарм, Оросын “Спутник V” вакциныг оруулж ирэхээр төлөвлөж буй юм.
Дээрх дөрвөн вакцинаас Файзер болон АстраЗенекад ДЭМБ шинэ коронавирусаас урьдчилан сэргийлэх вакцинжуулалтад хэрэглэх зөвшөөрөл олгосон. Харин үлдсэн хоёр нь одоогоор зөвшөөрлөө аваагүй байгаа юм.
Өнөөдөр оройн нислэгээр БНХАУ-аас ирэх вакцин ямар вакцин болох талаар Улсын онцгой комиссын хэвлэлийн төлөөлөгч Ц.Ганзориг “БНХАУ-аас өнөөдөр орой Синофарм вакцин ирнэ. Одоогоор ДЭМБ зөвшөөрөл өгөөгүй байгаа тул өнөөдөр ирэх вакциныг хадгалж байгаад, зөвшөөрөл өгсний дараа дархлаажуулалтад ашиглана” гэх мэдээллийг өгсөн юм.
Өөрөөр хэлбэл, өнөөдөр орой БНХАУ-аас 300,000 тун Файзер вакцин бус Синофарм вакцин ирэх юм. БНХАУ синофарм нэртэй вакциныг үйлдвэрлэж буй бөгөөд файзер вакциныг БНХАУ-д үйлдвэрлээгүй. Маргааш эхлэх вакцинжуулалтын ажлыг АстраЗенека вакцинаар эхлүүлэх юм.
