Бадарч Бямбадулам гэх фэйсбүүк хэрэглэгч 2024.11.23-нд “Бидний үр хүүхэд туршилтын харх биш!!!” гэсэн гарчиг бүхий лайв видео хийжээ.
Энэхүү видеонд Хүний папилломавирусийн эсрэг болон бусад товлолт вакцинуудын талаар ярьсныг нягтал өгөх хүсэлт ирсэн юм.
Нийт 1:11:53 цаг үргэлжлэх уг видеоны үеэр олон мэдээлэл яригдсаны нэг нь дархлааны тухай байв. Энэ талаар бид нягталлаа.
“Вакцинжуулалт бол дархлаажуулалт биш болсон гэдгийг Японд сурдаг эрдэмтэд гаргаж ирж байгаа. Нямбаяр гэж Японд сурдаг доктор бас хэлсэн байгаа, вакцинжуулалт бол дархлаажуулалт биш гэж. Нямбаяр гээд дархлаа судлаач бол АШУҮИС-ийн зөвлөх профессор хүн юм байна” гэж Бадарч Бямбадулам хэлээд “Одоогоор дархлааг гаднаас дэмжих боломжгүй. Ихэнх тохиолдолд дархлаа дэмжинэ гэсэн бэлдмэлүүд нь шинжлэх ухааны нотолгоогүй бизнесийн шинж чанартай байдаг. Дэлхий нийтэд ч ийм бүтээгдэхүүнүүдийг үндсэн уугуул иргэддээ хэрэглэдэггүй. Хүн өөрийнхөө дархлааг машинаа засаж байгаа юм шиг хүчээр сэргээх, засах боломжгүй гэдгийг хүмүүс ойлгохгүй байна. Тариа хийгээд эдгэчихнэ гэж эндүүрдэг. Одоогийн байгаа мэдлэг дээрээ тулгуурлаад гурван, дөрвөн зүйлд анхаарах хэрэгтэй. Цэвэр агаар, ой модонд 1-2 цаг алхах. Дархлааны эсүүд улам сэргэдэг…” гэж Нямбаяр судлаач ярьсан гэлээ.
Factcheck:
Энэхүү агуулга нь Японы Riken шинжлэх ухааны үндэсний хүрээлэнгийн дархлаа судлаач доктор Д.Нямбаярын 2017.07.03-нд GoGo.mn сайтад өгсөн Д.Нямбаяр: Дэлхийд шинээр нэвтрүүлэх хавдрын эмчилгээг би Монголдоо хийнэ хэмээн гарчигтай ярилцлагын хэсэг аж.
Тухайн агуулгын талаар Д.Нямбаяр доктортой холбогдож тодруулахад “Дархлаа тогтоох цорын ганц арга нь одоогоор вакцин. Энэ санаагаар хэлсэн хэсэг байна” хэмээн тодруулж хэллээ.
Иймд аливаа мэдээллийг баталгаатай эх сурвалжаас авч, үргэлж нягталж шалгаж байхыг Factcheck.mn сануулсаар байна.
Эрүүл мэндтэй холбоотой аливаа мэдээллийг албан ёсны, баталгаатай эх сурвалжаас авч, үргэлж нягталж байхыг Factcheck.mnсануулсаар байгаа билээ.
- Эх сурвалж:
- GoGo.mn
- Riken шинжлэх ухааны үндэсний хүрээлэнгийн дархлаа судлаач доктор Д.Нямбаяр
