Khulan Ruchira хэмээх фэйсбүүк хэрэглэгч “Турк одоо Хятадыг олон улсын шүүхэд өгөх гэж байгаа юм байна. Хятад вакцин хийлгээд хиарсан гэнэ” гэсэн пост оруулжээ.
Уг мэдээллийг 382 хүн цааш түгээж, 82 хүн сэтгэгдэл бичиж, 141 хүн лайк дарсан байна.
Энэхүү мэдээллийг нягталлаа.
Factcheck: ХУДАЛ
Турк улс 2021 оны нэгдүгээр сард БНХАУ-ын Синовак вакцинаар иргэдээ вакцинжуулж эхэлсэн. Тус улсад хийгдсэн эмнэлзүйн гуравдугаар туршилтаар Синовак үйлдвэрийн вакцин 83%-ийн үр дүнтэй гэж дүгнэжээ.
Тус вакцины ачаар халдвар авч буй 65 болон түүнээс дээш насныхны тоо 17.7% – 8.2% болтлоо буурсан хэмээн Туркийн Эүүл мэндийн сайд өнгөрсөн сард мэдэгдэж байсан.
Харин дөрөвдүгээр сараас эхлэн нэмж Pfizer-BioNTech компанийн вакцин оруулж ирсэн бөгөөд энэ сард ОХУ-ын Спутник V вакцинаас 50 сая тунг худалдан авахаар тохиролцжээ.
Одоогийн байдлаар Турк улсад 9.6 сая хүн вакцины хоёр дахь тунгаа хийлгэсэн ба нийт эдгэсэн хүний тоо 4.5 саяд хүрчээ.
Шинжээчдийн үзэж буйгаар эдгэрсэн тохиолдол ба вакцины үр дүнд нийт иргэдийн 25% нь дархлаатай болсон байна.
ДЭМБ цар тахлыг хумихын тулд улс орнуудын нийт хүн амын 60-70% нь халдвар авч эдгэх, эсвэл вакцинд хамрагдах замаар дархлаатай болох шаардлагатай хэмээн мэдээлсэн. Энэ дагуу Турк улс “сүргийн дархлаа”-наас илүү “масс дархлаа” үүсгэх бодлого баримталж байна.
Коронавирусээс үүдэлтэй нас баралтыг бууруулахын тулд эхний ээлжид 40-өөс дээш насны бүх иргэнээ вакцинд хамруулах нь зүйтэй. Учир нь 40-өөс дээш насны хүмүүс архаг хууч өвчтэй байх нь түгээмэл хэмээн Эрүүл мэндийн яам нь мэдээлжээ. Тус улс нь вакцинд хамрагдах шаардлагатай 18-аас дээш насны 60 орчим сая хүнтэй.
Эх сурвалж:
·https://www.dailysabah.com/turkey/turkey-close-to-mass-immunity-goal-against-coronavirus/news
·https://news.cgtn.com/news/2021-04-16/Turkish-study-shows-China-s-Sinovac-vaccine-significantly-effective–Zvkj1nMGZ2/index.html
·https://www.chinadaily.com.cn/a/202104/16/WS60792a60a31024ad0bab60d8.html
·https://www.reuters.com/world/middle-east/erdogan-says-turkey-has-enough-covid-19-vaccine-now-2021-04-30/
НҮБ-ын Хүүхдийн Сангийн дэмжлэгтэйгээр нягтлав.
Нягталсан: А.Одонтуяа
