Tserenkhuu Ishtseden хэмээх фэйсбүүк хэрэглэгч “Улаанбурханы вакцин хүүхдийн төв мэдрэлийн системд муу нөлөөтэй гэсэн эрдэмтэдийн судлагаа гарлаа…” гэсэн пост оруулсныг нягталж өгөх хүсэлт ирсний дагуу нягталлаа.
Factcheck:
Улаанбурхан өвчний эсрэг вакцин хүүхдийн төв мэдрэлийн системд нөлөөлдөг гэсэн судалгаа гарсан гэсэн нь нотлогдохгүй байна.
Харин Улаанбурхан өвчний вакцинтай холбоотой хамгийн сүүлийн шинэ судалгааг 2025.01.11-нд АНУ-ын Биотехнологийн мэдээллийн үндэсний төв нийтэлжээ. Энэхүү судалгаагаар 12-оос доош сартай хүүхдүүдэд хийсэн улаанбурхан өвчний эсрэг вакцины сөрөг нөлөөллийг судлахад тарьсан хэсэгт улайх, халуурах, зарим тохиолдолд бөөлжих зэрэг вакцины дараа түр хугацаанд үргэлжилдэг хариу урвалууд илэрсэн бөгөөд ноцтой сөрөг нөлөө илрээгүй талаар бичсэн байна.
Түүнчлэн ДЭМБ-аас вакцины талаарх томоохон судалгааг 2025.12.12-нд танилцуулсан. Вакцины аюулгүй байдлын дэлхийн шинжээчдийн хорооны шинэ дүн шинжилгээгээр, одоогоор байгаа шинжлэх ухааны нотолгоонд үндэслэн вакцин болон аутизмын спектрийн эмгэг (ASD) хооронд ямар нэгэн шалтгаант холбоо байхгүй гэдгийг тогтоосныг мэдээлсэн.
Вакцины аюулгүй байдлын асуудлаарх Дэлхийн зөвлөх хороо (GACVS) нь 1999 онд байгуулагдсан бөгөөд вакцины аюулгүй байдалтай холбоотой дэлхийн хэмжээний тэргүүлэх асуудлуудад ДЭМБ-д хараат бус, шинжлэх ухаанд суурилсан, эрх бүхий зөвлөгөө өгөх зорилготой олон улсын мэргэжилтнүүдээс бүрддэг.
Тус хороогоор мөн хэлэлцсэн дээрх дүн шинжилгээгээр 2010.01 сараас 2025.08 дугаар сар хүртэлх хугацааны, олон улс орны өгөгдлийг хамарсан 31 анхдагч судалгаанд тулгуурласан бөгөөд хүүхэд болон жирэмсний үед хэрэглэгддэг вакцинуудын аюулгүй байдлыг нарийн судалж, аутизмтай ямар ч шалтгаант холбоо байхгүй гэдгийг нотолсон байна.
Мөн тиомерсал буюу мөнгөн ус агуулсан хадгалах бодис, хөнгөн цагаан агуулсан вакцинуудтай холбоотой эрүүл мэндийн болзошгүй эрсдэлүүдийн тоймыг үнэлээд аюулгүй болохыг нотолжээ.
Хэрэв хүн амын товлолт дархлаажуулалтыг зохих түвшинд хүргэж чадахгүй бол вакцинаар сэргийлэх боломжтой байсан халдварт өвчнүүд дахин сэргэх аюултай байдгийг олон улсын эрүүл мэндийн мэргэжлийн байгууллагууд сэрэмжлүүлдэг. Вакцин тариулснаас үүдэн гарах эрсдэл нь тухайн өвчнөөр өвдсөнтэй харьцуулахад маш бага байдаг. Тухайлбал, халдварт саагийн вирус нь саа саажилт үүсгэнэ, улаанбурхан өвчнөөр сохрох ч аюултай байдаг. Монгол Улс л гэхэд 2014 онд Улаанбурхан өвчнийг бүрэн устгасан орон болж байв. Гэвч 2016 онд Улаанбурхан өвчний дэгдэлт гарч, 0-5 насны 59 хүүхэд энэ өвчнөөр эндсэн бол энэ удаагийн дэгдэлтээр 12 хүүхэд нас барсан гэсэн ХӨСҮТ-ийн мэдээлэл байна.
Халдвар авсан хүүхдүүдийн дийлэнх нь улаанбурханы вакцинд хамрагдаагүй байсныг эмч нар мэдээлж байв.
Улаанбурхан өвчин нь вакцинаар сэргийлэх бүрэн боломжтой өвчнүүдийн нэг бөгөөд энэ вакцинд хамрагдсан ихэнх хүнд насан туршийн дархлаа бий болгодог.
Мөн хүүхэд насандаа вакцинд хамрагдсаны үр дүнд жил бүр 4 сая хүн нас барахаас сэргийлж байгаа судалгааг АНУ-ын Халдварт өвчний хяналт, сэргийлэлтийн төв гаргасан байдаг. 2022.09.22-нд нийтэлсэн уг дата мэдээлэлд 2021-20230 онд л гэхэд вакцин 51 сая хүний амь насыг аварна гэжээ.
Тиймээс дээрх мэдээлэл нь эх сурвалжгүй, олон нийтийг төөрөгдүүлсэн ТАШАА мэдээлэл байна.
Эрүүл мэндтэй холбоотой аливаа мэдээллийг заавал нягталж, албан ёсны, баталгаатай эх сурвалжаас авч байхыг Factcheck.mn сануулж байна.
- ЭМЯ
- ХӨСҮТ
- АШУҮИС
- ДЭМБ
- АНУ-ын Биотехнологийн мэдээллийн үндэсний төв
