Дайнтай холбоотой хуурамч мэдээллийг үйл явдлын мэдээллээс 8 дахин илүү шэйрэлжээ 

Товч агуулга:

Монголын фэйсбүүк хэрэглэгчид мэдээллийг нягтлалгүй цааш түгээдэг, мэдээллийн боловсролоор маруухан хэвээр байгааг илтгэсэн нэг тод үйл явдал бол Орос, Украины дайн. Хоёр жил гаруйн өмнө эхэлсэн энэ үйл явдалтай зэрэгцээд дайнтай холбоотой хуурамч мэдээлэл, Оросын пропаганда, суртал ухуулга дэлхий даяар цахим орчныг хэрэх болсон. Харин мэдээллийн энэ дайнд өртөж байгаа орнуудын нэгд Монгол Улс багтсан билээ. Хойд хөршийн эхлүүлсэн дайны тухай монголчууд сошиал орчинд хэрхэн мэдээлж, ямар хариу үйлдэл үзүүлсэн талаар Эрэн Сурвалжлах Сурвалжлагчдын Төлөө Төв(MCIR) 2023 онд анх удаа цогц анализ хийж байсан байв. Уг судалгаагаар дайны талаарх эх сурвалжгүй мэдээллийг монголчууд маш их түгээсэн гэсэн үр дүн гарсан юм. Тэгвэл мэдээллийн вэбсайт, фэйсбүүк орчинд тархсан дайны тухай 700 орчим пост, мэдээлэлд хийсэн уг дүн шинжилгээг энэ удаа илүү нарийвчилж, хуурамч мэдээллийн түвшин, шинж чанарыг тодорхойлох зорилготойгоор хоёр дахь томоохон шинжилгээг MCIR хийж гүйцэтгээд байна.

Энэ удаагийн дүн шинжилгээгээр 2023 оны нэгдүгээр сараас 2024 оны нэгдүгээр сар хүртэлх хугацаанд зөвхөн фэйсбүүк орчинд тархсан дайнтай холбоотой мэдээлэл болон постуудад анализ хийлээ. Агуулгын хувьд өргөн хүрээтэй мониторинг хийх үүднээс дайнаас гадна Оростой шууд холбоотой, манай улсын стратегийн асуудлууд болох эрчим хүч, төмөр зам, цахилгаан станцаас гадна Орос болон АНУ, НАТО, барууны орнуудын харилцаа гэх мэт сэдвийг нэмж тусган, хамааралтай түлхүүр үгсийн тусламжтайгаар 500 орчим мэдээлэл ба постын бааз үүсгэж, шинжилгээ хийснийг тодотгоё.

Мониторингоос хэд хэдэн сонирхолтой үр дүн гарсан ба энэхүү нийтлэлээр дайнтай холбоотой хуурамч мэдээллийг түгээсэн байдлыг онцолж байна.

Нийт цуглуулсан мэдээлэлд контент анализ хийж, мэдээллийг зорилгоор нь үйл явдлын, пропаганда, хуурамч, Оросын эсрэг, про-Орос мэдээлэл хэмээн ангилсан. Үүнээс “Үйл явдлын мэдээлэл”-д аль нэг улс орон, тодорхой хүмүүсийн байр суурийг илэрхий дэмжиж, эсэргүүцээгүй, ихэвчлэн холбогдох үйл явдал, арга хэмжээ, ярилцлага зэргийг нэмэлт дүгнэлт, үзэл бодолгүйгээр түгээсэн мэдээллийг оруулж авч үзсэн бол “Хуурамч мэдээлэл”-д бодит бус баримтыг ашигласан, үнэн бус мэдээллийг оруулж ойлгосон. Ийнхүү дүн шинжилгээ хийхэд дайнтай холбоотой хуурамч мэдээлэл үйл явдлын мэдээллээс 8 дахин их шэйрлэгдсэн гэсэн үр дүн гарав. Өөрөөр хэлбэл, хуурамч мэдээллийн уншигчид огт нягтлалгүй цааш түгээх нь зонхилж байна гэсэн үг.

Мониторингийн энэ үр дүнгээс харахад нийт мэдээллийн талаас илүү хувь нь Оросын талыг хэт туйлширч дэмжсэн, суртал ухуулга болон хуурамч мэдээллүүд байлаа. Тухайлбал, Оросын пропаганда мэдээлэл 24%, Оросыг хэт туйлширч дэмжсэн үзэл бодол 23%, хуурамч мэдээлэл 6%-ийг тус тус эзэлсэн.

Энэ дүнгээс дайнтай холбоотой хуурамч мэдээлэл бага хувийг эзэлсэн мэт харагдаж болох юм. Гэхдээ Монголын Фэйсбүүк орчинд хуурамч мэдээллээс илүүтэй Оросыг дэмжихийг хүчтэй ятгаж, ухуулсан, тодорхой тоо, баримт бага, эх сурвалжгүй, ихэвчлэн хоёр орны түүхийг сануулж, барууны орнуудыг ихээхэн харлуулсан пропаганда хамгийн их байгаа нь ажиглагдсан. Тэдгээр пропаганда мэдээлэл түгээгчдийн нэг хэсэг нь өөрийн фэйсбүүк хуудастаа Оросыг дэмжихийг ятгаж, суртал ухуулга хийсэн пост, зураг, бичлэг маш идэвхтэй оруулдаг ч өөрийн хувийн мэдээлэл, зураг огт байдаггүй. Нөгөө нэг хэсэг нь өөрийн фэйсбүүк хуудаст огт идэвхгүй боловч олон дагагч нартай группүүдэд маш идэвхтэй, олон давтамжтай постууд оруулдаг байна. Мөн зарим тодорхой аккаунтуудыг харахад дайн болсны нэг жилийн ойн үеэр пропаганда постууд идэвхтэй оруулж байсан бол одоо сонгуультай холбоотой аль нэг улстөрч, намуудыг шүүмжилж, магтсан постууд их оруулж байгаа нь мониторингийн явцад ажиглагдсан юм.

Хариу үйлдлийн тухайд дайнтай холбоотой хуурамч мэдээлэлд дунджаар 583 удаа хариу үйлдэл үзүүлсэн бол нотолгоонд тулгуурласан үйл явдлын мэдээлэлд дунджаар 107 удаа хариу үйлдэл үзүүлсэн байгаа юм.

Нэг үйл явдлын мэдээлэл болон постыг дунджаар 14 удаа шэйрэлсэн байгаа бол нэг хуурамч мэдээллийг дунджаар 110 удаа шэйрэлсэн буюу Орос Украины дайнтай холбоотой хуурамч мэдээллийг Монголын фэйсбүүк хэрэглэгчид үйл явдлын мэдээллээс 8 дахин илүү түгээжээ. 

Жишээлбэл, “Хятадын удирдагч Ши Жиньпин дэлхийн 3-р дайны аюул заналхийлбэл бид холбоотон Оростоо туслах болно” гэсэн нь хуурамч мэдээлэл 7200 орчим хариу үйлдэл авсан ба 6000 орчим нь дэмжсэн, 1100 орчим нь цааш түгээж шэйрэлсэн байна. 

Ийнхүү хариу үйлдлийн хувьд нэг хуурамч мэдээлэл үйл явдлын мэдээллээс дунджаар 2 дахин шэйрлэгдсэн байсан бол дайнтай холбоотой хуурамч мэдээлэл үйл явдлын мэдээллээс 8 дахин их шэйрлэгдсэн байгаа ба энэ нь Оростой холбоотой бүхий л сэдвүүдээс дайнтай холбоотой асуудалд хуурамч, пропаганда мэдээллийн тархац хамгийн их байгааг илтгэсэн юм.

Иймд аливаа мэдээллийг цааш түгээхээсээ өмнө заавал нягталж, баталгаатай эх сурвалжаас мэдээллээ авах мэдээллийн боловсролыг фэйсбүүк хэрэглэгч бүр дадал болгон суулгах шаардлагатай байна.  

Энэхүү мэдээлэлд дурдсан ИЛ 96 400М загвартай онгоц нь 2030 он хүртэл захиалга нь дууссан гэдэг нь хуурамч мэдээлэл. Тус загварын онгоцны туршилт амжилттай болсон гэдгээс өөр арилжаанд гаргасан болон худалдан авалтын захиалгатай холбоотой мэдээлэл огт гараагүй. Түүнчлэн ОХУ-д олон улсаас тавьсан хориг арга хэмжээний хүрээнд Оросын агаарын тээврийн салбарт үйлчилгээ үзүүлэх, сэлбэг нийлүүлэхийг хорьсонтой холбогдуулан Оросын агаарын тээврийн салбар нь зөвхөн дотоодын хэрэгцээгээ хангахад л маш хүндрэлтэй байгаа билээ. Уг пост нь нийт 297 хариу үйлдэл авсан бөгөөд 233 хүн дэмжиж, 34 удаа шэйрэлжээ.

Төстэй мэдээлэл

Иргэний хөдөлгөөний намын дарга Ж.Занаа өөрийн фэйсбүүк хуудастаа коронавирусийн талаарх нэгэн мэдээллийг нийтэлсэн нь олон хүнд хүрээд байна. Уг постод “ШУУРХАЙ МЭДЭЭ: ДЭМБ 180 ГРАДУС ЭРГЭЛТ ХИЙЛЭЭ. КОРОНАГЫН ӨВЧТӨН ТУСГААРЛАГДАХ НЬ ХЭРЭГГҮЙ, КАРАНТИНД ОРОХ Ч ХЭРЭГГҮЙ, ХООРОНДЫН ЗАЙ БАРИХ Ч ХЭРЭГГҮЙ, ТЭР БҮҮ ХЭЛ ХЭН НЭГНЭЭС НӨГӨӨ ХҮНД ХАЛДДАГГҮЙ ГЭДГИЙГ МЭДЭГДЭЖ БАЙНА!!! Breaking news: WHO […]

Улаанбаатар хотын нийтийн тээврийн парк шинэчлэлийн хүрээнд худалдан авсан автобуснууд шинэ, хуучин гэсэн маргаан нийгэмд дэгдээд буй. Энэ нь Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны дарга Ж.Сүхбаатарын хөрөнгийн зардалд тусгасан 339.7 тэрбум төгрөгийн хүрээнд хийгдсэн ажил юм. Тэрбээр өмнө нь автобусны талаар ямар суурь илэрхийлж байсныг нягталлаа.

“…Вакцины хоруу чанар маш их нэмэгдэж, мөнгөн ус болон хүнд металлын орц агуулж, хуучныхтай огт адилгүй болсныг бүх дэлхийгээрээ ярьж бичиж, манайхаас бусад бараг бүх хэл дээр эрдэмтэн эмч судлаачид нь ном, нийтлэл бичиж, барууны эцэг эхчүүд нь зөндөө эсэргүүцэж тэмцээд байхад гуравхан сая бид мэдрэлгүй мэт гөлийгөөд геноцид хийлгээд байх уу?????!!!!!…” Энэхүү агуулгыг нягтаж […]

Товч агуулга Газрын тухай хуульд хамгийн сүүлд 2022.07.05-нд нэмэлт өөрчлөлт оруулсан ба дээр пост дахь агуулга бүхий заалт алга. Ж.Энхбаяр одоогоор парламентад дэвшиж, сонгогдоогүй буюу УИХ-ын гишүүн биш, Үндэсний Аюулгүй Байдлын Зөвлөлийн нарийн бичгийн даргаар ажиллаж байна. Уг бичлэг дорж хаяж хоёр жилийн өмнөх үйл явдлыг харуулж байна. Хөтлөгч Ezo Enhzorig нэртэй фэйсбүүк хаягаас 2022.09.15-ны […]

Товч агуулга УИХ-ын гишүүн Д.Тогтохсүрэн Пүрэв гарагийн УИХ-ын чуулган дээр Сонгуулийн Ерөнхий Хорооны гишүүнийг сонгох, чөлөөлөх тухай асуудлыг хэлэлцэх үеэр Цагдаагийн Ерөнхий Газрын дарга Т.Сүхболдоос цахим сүлжээний зохицуулалтын талаар асуухдаа “Албан бус мэдээгээр Монгол Улсад 2.6 сая фэйсбүүк хаяг байгаа. Үүний 1.5 сая нь хуурамч хаяг байна. УИХ-ын гишүүд, улс төрчдийг жирийн үед гөвж байна. […]

УИХ-ын гишүүн, Шударга иргэдийн нэгдсэн намын дарга, ШИНЭ эвслийн тэргүүн Ж.Батзандан өнгөрсөн тавдугаар сарын 25-ны өдрийн 11:00 цагт Төрийн ордонд хийсэн хэвлэлийн хурлын үеэрээ Үндсэн хуульд орсон нэмэлт, өөрчлөлтийн заримыг нь өөрийн намын санаачилга мэтээр ярив. Тодруулбал, энэхүү хурлын үеэр тэрбээр Үндсэн хуульд оруулсан 30 гаруй нэмэлт, өөрчлөлтийн 4-5 нь ШИНЭ намын санаачилгаар орсон нэмэлт […]

Өөр мэдээ олдсонгүй.

Хандив

FactCheck.mn сайт нь бие даасан, хараат бус редакц бөгөөд бид сурталчилгаа олгогчдод биш, иргэдэд үйлчилдэг. Бид аливаа компани, улстөрч, засгийн газрын нөлөөнд автахгүй, зөвхөн олон нийтийн эрх ашгийн төлөө ажиллана.

Гэвч нягтлан шалгах ажил нь цаг, мөнгө, шаргуу хөдөлмөр шаарддаг билээ.

Иймд, манай редакц хараат бус байдлаа хадгалж, илүү хүчтэй болоход таны дэмжлэг чухал юм!

Та бидний үйл ажиллагааг дэмжиж байвал ХАС БАНК 5001984178 ЭССТ НҮТББ дансаар хандив өгөх боломжтой. Гүйлгээний утган дээрээ ХАНДИВ гэдгээ тодорхой бичээрэй. Хүсвэл нэр, холбогдох утасны дугаар зэрэг хувийн мэдээллээ оруулж болно.

Биднийг дэмжсэн танд маш их баярлалаа.

Мэдээлэл хайх