Намуудын хамгийн өндөр төлбөртэй Фэйсбүүк дэх пост $4,000

Сүүлийн нэг сард буюу 2024.05.25-06.24-нд Монгол Улсаас Метагийн төлбөрт 1 сая орчим ам.доллар гадагш урссан байна. Тодруулбал, 379 фэйсбүүк хэрэглэгч хувь хүн болон пэйжээр дамжуулан 100-29,000 хүртэл ам.долларын төлбөртэй пост нийтэлсэн бол 100 ба түүнээс бага дүнтэй ам.доллар төлсөн хаягийн тоо 411 байгаа юм. Эдгээрийн дийлэнх нь УИХ-ын сонгуулийн сурталчилгаатай холбоотой билээ.

Тэгвэл сонгуульд өрсөлдөж буй намууд дотроос МАН, АН, ХҮН хамгийн өндөр мөнгөн дүнг цахим орчин дахь сонгуулийн сурталчилгаандаа зориулж, Мета компанид 66 мянга орчим ам.доллар (230 орчим сая төгрөг) зарцуулжээ.

Эндээс намуудын зардлыг харвал ХҮН намын нэг постод зарцуулсан мөнгө харьцангуй өндөр дүнтэй буюу “Цаг нь болсон” гэх видеог 2-2.5к ам.доллароор түгээсэн нь хамгийн өндөрт тооцогдож байна.

АН-ын тухайд пэйж хуудсаар хамгийн өндөр мөнгөн дүнг төлж олон нийтэд түгээсэн пост бол нэр дэвшигч Ч.Лодойсамбуугийн бичлэг байв. Энэ постонд 400-499 ам.доллар төлжээ.

Харин МАН албан ёсны бүртгэлтэй пэйж хуудсаараа түгээсэн мэдээлэлд 300-399 ам.доллар төлсөн нь хамгийн өндөрт тооцогдов.

Ийнхүү гурван гол намаас ХҮН нам хамгийн өндөр дүнтэй мөнгөөр нийгмийн сүлжээнд сурталчилгаа түгээсэн байгаа ч анхаарал татах нэг суваг бол “Ард түмний ялалт” нэртэй пэйж.

Ерөнхий сайд, МАН-ын дарга Л.Оюун-Эрдэнийн зураг бүхий уг пэйж нь 478 мянган дагагчтэй. Сонгуулийн сурталчилгаа эхэлсэн 2024.06.10-ны өдөр нэрээ сольж “Ард түмний ялалт” болгосон ч 2023.05.31-ний өдрөөс хойш Chill Bill нэртэй байжээ.

Анх 2019.12.09-нд нээсэн уг пэйж YZ tv гэх нэртэй байсныг ийнхүү Ерөнхий сайдын зурагтай, МАН-ыг сурталчлах цахим хуудас болгон ашигласан нь харагдаж байна. Ташрамд дурдахад 478,000 дагагчтай фэйсбүүк пэйжийн албан бус зах зээлийн үнэлгээ нь 40 орчим сая төгрөг байжээ.

Сонгуулийн сурталчилгаа эхэлсэн өдрөөс хойш “Ард түмний ялалт” хуудсаар дамжуулан нийт 84 удаагийн төлбөртэй пост нийтэлсэн нь бүгд 2024 оны зургаадугаар сарын 10-наас хойш байна.

Тухайлбал, С.Зориг агсны дүү С.Оюун Ерөнхий сайд Л.Оюун-Эрдэнийг дэмжихээ илэрхийллээ гэсэн постыг түгээхэд зориулж 3500-4000 ам.доллар төлжээ.

Уг 84 сурталчилгаанаас хамгийн сүүлчийн гурван постыг харахад 3000-3500 хүртэл долларыг нэг пост түгээхэд хаясан байна.

Үүний нэг нь АВЛИГАЧИД ЯЛАХ УУ? АРД ТҮМЭН ЯЛАХ УУ? гэсэн гарчигтай сэтгүүлч М.Батбилэгийн видео контент бөгөөд уг постыг 25-27-нд 3500 ам.доллар Метад төлж цааш түгээсэн байна.

Сонгуулийн тухай хуулийн 47 дугаар зүйл.Сонгуулийн сурталчилгаанд цахим орчин ашиглах тухай заалтад

  • 47.1.Сонгуулийн сурталчилгаанд дараах хэлбэрийн цахим хуудас ашиглаж болно:
  • 47.1.1.нэр дэвшигчийн болон нам, эвслийн өөрийн тус бүр нэг цахим хуудас;
  • 47.1.2.цахим орчин дахь олон нийтийн сүлжээний цахим хуудас;
  • 47.1.3.бусад цахим хуудас.
  • 47.2.Нэр дэвшигч энэ хуулийн 47.1.1, 47.1.2-т заасан цахим хуудсыг сонгуулийн сурталчилгаанд ашиглах тохиолдолд цахим хуудсыг нэр дэвшигчийн үнэмлэх авсан өдрөөс хойш гурав хоногийн дотор тухайн аймаг, нийслэлийн сонгуулийн хороонд бүртгүүлнэ.
  • 47.3.Энэ хуулийн 47.1.1, 47.1.3-т заасан цахим хуудас ашиглан сонгуулийн сурталчилгаа явуулахдаа сэтгэгдэл бичигдэхгүй тохиргоотойгоор нийтэлнэ.
  • 47.4.Энэ хуулийн 47.2-т заасны дагуу бүртгүүлээгүй цахим хуудсыг сонгуулийн сурталчилгаанд ашиглах, бусдын нэр болон хуурамч хаяг ашиглахыг тус тус хориглоно гэж заасан.

Гэвч СЕХ-нд бүртгүүлсэн албан ёсны цахим хуудас биш, Ард түмний ялалт гэх албан бус хаягаар МАН гол сурталчилгаагаа түгээсэн нь харагдаж байна.

Уншигч Та бүхэн энэхүү мэдээллийг өөрсдөө шалгаж үзэх боломжтой юм. Та тухайн Фэйсбүүк пэйж хуудсаар ороод ABOUT гэсэн цэс рүү орж, PAGE TRANSPARENCY гэсэн хэсэгт нэвтрээд дэлгэрэнгүй мэдээллүүдийг харах боломжтой.

Улмаар дараах зураг дээр үзүүлсэнчлэн хамгийн доор хэсэгт байгаа Go to ad Library гэсэн бичиг дээр дарснаар төлбөртэй пост бүрийн талаарх дэлгэрэнгүй мэдээллийг харах боломжтой.

Эх сурвалжууд:

Мета

legalinfo.mn

Төстэй мэдээлэл

Наймдугаар сарын 23-нд Халуун Цуст Мөн_Голч_ууд фэйсбүүк хуудсан дээр хуваалцсан видеог маш олон хүн цааш нь тараажээ. Уг бичлэгт: мРНА Вакцин тариулсан хүмүүс 6 сараас 3н жилийн дотор үхнэ хүүхэд гаргах боломжгүй болно цусны донор өгөх боложгүй гэх мэт … Оксфордын доктор Sean Brooks AНХААРУУЛЖ байна!!! 3р ТУН, ХҮҮХДҮҮДЭД ТАРИХ талаар яригдаж байгаа энэ үед […]

Коронавирусийн дельта хувилбар дэлхийн улс орнуудад илэрч, халдвар дахин нэмэгдэх болов. Үүнтэй зэрэгцээд олон нийтийн сүлжээгээр вакцинтай холбоотой олон нийтийг төөрөгдүүлсэн элдэв пост зөвхөн Монголд төдийгүй гадны улс орнуудад ч тархсаар байна. Тиймээс нийгэмд буруу ойлголт өгсөн мэдээллүүдийг олон улсын баримтыг нягтлагчид шалган нягталж түгээсээр байгаа юм. Наймдугаар сарын 5-нд USA Today-ийн нягталсан мэдээллийг хүргэе. […]

Саримс идэх нь шинэ коронавирусийн халдвараас хамгаална гэсэн мэдээлэл нийгмийн мэдээллийн сүлжээнд дахин тархаад байна. Тэгвэл энэ нь худал мэдээлэл болох тухай ДЭМБ-аас энэ оны 2 дугаар сард мэдээлсэн. Саримс нь эрүүл хоол хүнсэнд ордог бөгөөд зарим бичил биетний эсрэг үйлчилгээтэй гэдэг нь нотлогдсон хэдий ч COVID19 буюу шинэ коронавирусээс хамгаална гэсэн нотолгоо байхгүй гэдгийг ДЭМБ-аас зөвлөжээ. […]

Товч агуулга Вакцины нэмэлт тун хийлгэсэн хүмүүс хийлгээгүй хүмүүстэй харьцуулахад эмнэлэгт хэвтэх нь 70-90% бага байна. Израильд хийсэн судалгаагаар коронавирусийн эсрэг вакцины 4 дэх тун эсрэг биетийг тав дахин нэмэгдүүлсэн үр дүн гарсан. Нягтлах мэдээ Goymedee гэх нэртэй сайт “Вакцины дөрөв дэх тун дархлааг улам сулруулна гэв” гэсэн гарчигтай мэдээ 2021.01.12-нд нийтэлжээ. Уг мэдээнд “Европын […]

Монгол Улсын ФАТФ-ын Саарал жагсаалтаас гарсан хэмээн ташаа мэдээлэл түгээсэн Гадаад харилцааны сайд уг мэдээллээ залруулахдаа дахин буруу мэдээлэл түгээв. Тэрбээр өөрийн твиттер хуудасдаа “Татварын сайн засаглалын зарчмуудыг хэрэгжүүлэхэд ЕХ-той хамтран ажиллах шаардлагатай улсуудын жагсаалт” буюу саарал жагсаалтаас Монгол Улсыг гаргасан шийдвэрийг ЕХ-ны Сангийн сайд нар энэ 6-нд гаргасан болохыг мэдээлсэн.”, “ЕХ-ны “саарал жагсаалт” нь […]

Товч агуулга 2021 онд бүртгэгдсэн сэтгэцийн эмгэгийн 58.2%

Өөр мэдээ олдсонгүй.

Хандив

FactCheck.mn сайт нь бие даасан, хараат бус редакц бөгөөд бид сурталчилгаа олгогчдод биш, иргэдэд үйлчилдэг. Бид аливаа компани, улстөрч, засгийн газрын нөлөөнд автахгүй, зөвхөн олон нийтийн эрх ашгийн төлөө ажиллана.

Гэвч нягтлан шалгах ажил нь цаг, мөнгө, шаргуу хөдөлмөр шаарддаг билээ.

Иймд, манай редакц хараат бус байдлаа хадгалж, илүү хүчтэй болоход таны дэмжлэг чухал юм!

Та бидний үйл ажиллагааг дэмжиж байвал ХАС БАНК 5001984178 ЭССТ НҮТББ дансаар хандив өгөх боломжтой. Гүйлгээний утган дээрээ ХАНДИВ гэдгээ тодорхой бичээрэй. Хүсвэл нэр, холбогдох утасны дугаар зэрэг хувийн мэдээллээ оруулж болно.

Биднийг дэмжсэн танд маш их баярлалаа.

Мэдээлэл хайх