Товч агуулга
Зургаан сартайгаас доош насны хүүхдийг ээж нь вакцин хийлгэсний дараах эхний 48 цагт хөхүүлэхдээ болгоомжтой байхыг судлаачид сануулаад судалгааны үр дүнд вакцинжуулалт нь аюулгүй байсан гэдгийг хэлжээ.
Аль нэг вакцин нь хөхөөр хооллож буй нярай хүүхдэд хор хөнөөл учруулдаг гэсэн нотолгоо байхгүй.
Вакцин нь эхчүүдийн хөхний сүүнд коронавирус буюу SARS-CoV-2-ыг таньдаг эсрэгбие, тэр ч байтугай зарим дархлааны эс үүсгэдэг бөгөөд үүгээр дамжин нярай хүүхдэд тодорхой хэмжээний дархлаа үүсгэнэ гэж үзэж байна.
Bolorma Bat-ulzii “ЭХИЙН СҮҮГЭЭР ХӨХҮҮЛ ХҮҮХДҮҮД ВАКЦИН АВЧ ХОРДОЖ БАЙГАА НЬ ИЛЭРЛЭЭ” гэсэн постыг 2022.10.19-ний өдөр оруулжээ.
Уг постод “Вакцин тариулсан Эхийн сүүнд вакцины найрлагад орсон mRNА илэрсэнийг 2022.10.3 ны Германыг сонинд мэдээллээ. Мэргэжилтэн энэ ямар хортойг ярьсан бна. Вакцин үйлдвэрлэгчид ба таригчид эхийн сүүнд вакцин илрэхгүй гэж хэлж байсан. Хаана бна вэ??
Хуурч байгаад жирэмсэн эхчүүд, хөхүүл эхчүүдэд хийчихсэн! Анагаах ухаанд хэзээ ч хөхүүл эх, жирэмсэн эхэд вакцин хийх хориотой гэж үздэг. Эм, тариа ч цээрлэхийг зөвлөдөг. Гэтэл эхийн сүүгээр эрүүл хүүхдүүд вакцин авч бна. Ийм хүүхэд ухаан сэтгэхүй, хөгжил эрүүл байх магадлал тун бага! Хорлонтой Билл Гейтс, түүний хамтрагч ДЭМБ, ЭМЯам. Хүүхдүүдийн хувь заяа хайран! Шайрлэнэ үү.
ВАКЦИН ХИЙЛГЭСЭН БОЛ ХҮҮХДЭЭ БҮҮ ХӨХҮҮЛ!!! ХОРТОЙ СҮҮ ӨГЧ БАЙСНААС ҮНЭЭНИЙ ЮМУУ, ДЭЛГҮҮРИЙН СҮҮ ӨГСӨН ДЭЭР ШҮҮ!! ТҮГЭЭГЭЭРЭЙ” гэжээ.
Энэхүү постыг 24 хүн шэйрлэж, 32 хүн лайк дарсан бөгөөд нэг хүн коммент бичсэн нь итгэсэн агуулгатай байна.
Уг агуулгыг нягталлаа.
Вакцин хөхний сүүгээр дамжиж байгаа талаар гаднын улс орнуудад цөөнгүй мэдээлэл цахим сүлжээнд тарсныг олон улсын баримтыг нягтлагчид шалгасан байна.
Хамгийн сүүлд Олон Улсын баримтыг нягтлагч Poynter институсийн дэргэдэх Politifact.com сайт энэ талаар нягталжээ. Мөн Factcheck.org ч энэ асуудлыг хөндөн нягталсан байна.
Factcheck:
Олон нийтийн сүлжээгээр дамжин улс орон хамаарахгүй тархсан уг агуулга нь хязгаарлагдмал хийгдсэн судалгаатай холбоотой аж.
Тодруулбал, эрүүл мэндийн JAMA сэтгүүлд нийтлэгдсэн судалгаагаар төрөөд хагас жил болоогүй байгаа, Pfizer болон Moderna вакцин хийлгэсэн ердөө 11 ээжийг хамруулж, хөхний сүүн дэх вакцины ул мөрийг судалсан тухай бичжээ. Ингэхдээ ээжүүдээс вакцин хийлгэхээс өмнө болон хийлгэснээс тав хоногийн дараа хөхний сүүний дээж авсан байна.
Бүртгэгдсэн хөхүүл 11 ээжээс таван хүний долоон дээжид Pfizer(BNT162b2) болон Moderna(mRNA-1273) вакцины ул мөрийг дархлаажуулалтад хамрагдсанаас хойш 45 цагийн дотор илрүүлсэн хэмээн бичжээ.
Тэгвэл энэ дүгнэлт нь судлаачдыг тэгж их донсолгоогүй болохыг Politifact онцолжээ. Учир нь mRNA вакциныг нотолгоонд суурилан гаргаж ирсэн бөгөөд COVID-19 mRNA-ийн вакцин хийлгэсний дараа хөхөөр хооллох нь аюулгүй, ялангуяа вакцин хийлгэснээс хойш 48 цагийн дараа гэдгийг судлаачид хэлсэн байна. Харин аюулгүй байдлын талаарх нэмэлт судалгаанууд хийгдтэл зургаан сартайгаас доош насны хүүхдийг ээж нь вакцин хийлгэсний дараах эхний 48 цагт хөхүүлэхдээ болгоомжтой байхыг судлаачид сануулаад судалгааны үр дүнд вакцинжуулалт нь аюулгүй байсан гэдгийг нэмж хэлжээ.
КОВИД-19-ийн эсрэг вакциныг зургаан сартайгаас доош насны хүүхдүүдэд зөвлөхгүй байгаа. Гэхдээ АНУ-ын Халдварт өвчний хяналт, сэргийлэлтийн төв, Америкийн эх барих эмэгтэйчүүдийн эмч нарын зөвлөл, Эх ургийн анагаах ухааны нийгэмлэгээс жирэмсэн болон хөхүүл ээжүүдийг вакцинд хамрагдахыг зөвлөж байгаа юм.
Нью-Йоркийн их сургуулийн дэргэдэх, Лонг Айландын Langone эмнэлгийн нярайн эмч, доктор Назийх Ханна Politifact-д “Хэдийгээр ихэнх мэдээлэл дутуу байгаа ч аль нэг вакцин нь хөхөөр хооллож буй нярай хүүхдэд хор хөнөөл учруулдаг гэсэн нотолгоо байхгүй байна” хэмээн тайлбар өгчээ.
Хүүхэд COVID-19-ийн эсрэг вакцин хийлгэсэн эхийн хөхний сүүг хэрэглэх нь аюултай гэдгийг нотлох баримт байхгүй гэдгийг Factcheck.org мөн тэмдэглэсэн байна.
Харин эсрэгээрээ вакцин нь эхчүүдийн хөхний сүүнд коронавирус буюу SARS-CoV-2-ыг таньдаг эсрэгбие, тэр ч байтугай зарим дархлааны эс үүсгэдэг бөгөөд үүгээр дамжин нярай хүүхдэд тодорхой хэмжээний дархлаа үүсгэнэ гэжээ.
Судалгааны үр дүнг задалж харвал вакцин хийлгэснээс хойш 48 цагийн дотор л мРНХ-ийн хэмжээ маш бага илэрсэн бөгөөд энэ нь вакцинжуулалт нь нярай хүүхдэд аюултай гэсэн үг биш юм.
Америкийн Эх барих эмэгтэйчүүдийн эмч нарын зөвлөлөөс Factcheck.org-т ирүүлсэн тайлбарт хөхүүл үед COVID-19 вакцинжуулалтын аюулгүй байдлын талаар нэмэлт судалгаа хийх нь сайшаалтай боловч шинэ олдсон мэдээллүүд эмэгтэйчүүд хөхөөр хооллож эхлэхээс зайлсхийх эсвэл зогсоох шаардлагагүйг харуулж байна гэжээ.
Вакцин хийлгэсний дараах 45 цагийн дотор таван эмэгтэйн долоон дээжид вакцины мРНХ-ийн ул мөр олдсон талаар дээр дурдсан. Эдгээрээс хоёр эмэгтэйн хувьд вакцины мРНХ нь бүтэн сүүнд илрээгүй боловч судлаачид мРНХ-ийг илрүүлэх магадлалыг нэмэгдүүлэхийн тулд эсийн гаднах цэврүүт эсвэл өөх тосоор бүрхэгдсэн жижиг уутны тоог нягтруулах аргыг хэрэглэснээр заримыг нь илрүүлсэн байна. Тэгвэл цэврүүт уут хөхний сүүнд байгалиасаа байдаг ажээ.
Түүнчлэн сүүнд илэрсэн гэж байгаа вакцины мРНХ-ийн тухайд маш бага хэмжээтэй байсан байна. Тодруулбал, дээж болгон авсан сүүнд бүхэлдээ 12 пикограммаас бага, цэврүүт дотор 17 пикограммаас ихгүй байжээ. Өөрөөр хэлбэл, тэрбум тутамд 0.02 хэсгээс бага байсан гэсэн үг.
Гэсэн хэдий ч судалгааны авторууд энэхүү үр дүнг чухал гэж үзсэн. “Бид ээж COVID-19-ийн вакцин хийлгэсний дараа хөхөөр хооллох нь аюулгүй гэж үзэж байна. Гэсэн хэдий ч аюулгүй байдлын талаар нэмэлт судалгаа хийх хүртэл хөхүүл ээж вакцин хийлгэснээс хойших эхний 48 цагийн дотор 6 сараас доош насны хүүхдийг хөхүүлэхэд болгоомжтой хандах хэрэгтэй” гэж тэд нэмж хэлэв.
“Хэрэв та вакцин хийлгэхийг хүсвэл хөхөөр хооллохоо зогсоох шаардлагагүй. Вакцин хийлгэснээр таны биед бий болсон эсрэгбие нь хөхний сүүгээр дамжиж, таны хүүхдийг вирусээс хамгаалахад тусалдаг” хэмээн Америкийн Хүүхдийн эмч нарын академи мэдэгджээ.
Иймд хөхүүл ээжийн сүүгээр дамжин нялх хүүхдүүд вакцинд хордож байна гэдэг нь олон нийтийг төөрөгдүүлсэн ТАШАА мэдээлэл хэмээн олон улсын баримт нягтлагчид үнэлж байна.
Эх сурвалжууд:
https://www.cdc.gov/coronavirus/2019-ncov/vaccines/recommendations/pregnancy.html
https://nyulangone.org/doctors/1902849813/nazeeh-n-hanna
https://jamanetwork.com/journals/jamapediatrics/fullarticle/2796427
https://www.bfmed.org/abm-statement-considerations-for-covid-19-vaccination-in-lactation
https://www.who.int/publications/i/item/WHO-2019-nCoV-FAQ-Breast_feeding-Vaccines-2021.1
НҮБ-ын Хүүхдийн сантай хамтран бэлтгэв.
