Miniih – Минийх нэртэй фэйсбүүк хуудаст “Ковид тусаагүй хариуцлагатай иргэдээ урамшуулна” гэх мэдээллийг оруулжээ.
Энэхүү мэдээллийг нягталлаа.
Уг мэдээллийг https://xyznews24.com гэх сайт оруулсан бөгөөд тухайн мэдээлэлд “Өнөөдөр нийгмийн бодлогын байнгын хорооны хуралдаан Төрийн ордонд болж байна. Хуралдааны үеэр УИХ-ын гишүүн, Нийгмийн бодлогын байнгын хорооны дарга М.Оюунчимэг ковид тусаагүй иргэдээ төрөөс урамшуулах хэрэгтэй талаар онцлов. Тэрбээр “Бид цар тахлаар харамсалтайгаар амь насаа алдсан иргэдийн ар гэрт э.мгэнэл илэрхийлж байгаа. Нөгөө талаасаа ковид туссан хүмүүст багц олгоод, санхүүжилтыг нь шийдэж байгаа. Харин ковид ч тусаагүй, хариуцлагатай байгаа 2.7 сая иргэддээ талархал илэрхийлж, дэмжлэг юм уу, нэг удаа сувилалд хамруулах зэргийг бодолцох хэрэгтэй. 2022 оны төсөвт энэ хүмүүстээ бид яаж хандахаа тусгах хэрэгтэй. Энэ хүмүүс нийгэмдээ хариуцлагаа ухамсарлаж, өөрийгөө болон гэр бүлээ хамгаалаад явж байна. Хүмүүст “хариуцлагатай иргэдээ ингэж гоё урамшуулдаг юм байна, би бас анхаарах ёстой” гэсэн төлөвшлийг бий болгох талаар бодолцож, төсөвтэй уях ёстой” гэв” гэжээ.
Энэхүү мэдээлэл нь ковид тусаагүй хариуцлагатай иргэдээ урамшуулахаар болсон мэт гарчигтай боловч энэ нь УИХ-ын байнгын хорооны хуралдааны үеэр гарсан санал байв. Өөрөөр хэлбэл, дээрх санал албажиж эцсийн шийдвэр болж гараагүй. Ташаа мэдээлэл байна.
Монгол Улсын 2022 оны төсвийн төслийг УИХ-ын чуулганаар хэлэлцэж буй. Энэ удаагийн төсвийг халамжид бус хөдөлмөр эрхлэлтийг дэмжсэн төсөв байх талаар салбарын сайд мэдээлээд байгаа юм. Төсвийн төсөлд нэмэлт оруулах бол юун түрүүнд саналыг ажлын хэсэг холбогдох тооцоо, зардлыг гаргах бөгөөд холбогдох байнгын хороод дэмжсэний дараа төсөлд тусган чуулганаар хэлэлцэн батална. УИХ-ын гишүүн санал гаргаад түүнийг хэрэгжүүлэх боломжгүй гэсэн үг.
