Аливаа хүчирхийлэл, осол, байгалийн гамшиг зэрэг тусламж шаардлагатай болсон үед шүгэл үлээж яаралтай тусламж хүсэх “Шүгэл” төслийг УИХ дахь хүчирхийллийн эсрэг лобби бүлэг болон УИХ дахь эмэгтэй гишүүдийн бүлгээс эхлүүлж байгааг УИХ-ын гишүүн Х.Булгантуяа танилцуулсан.
“Хүүхдийн хүчирхийлэл болоод байгаа гэдгийг багш, хажуу хөрш айл нь мэдээгүй жишээнүүд олон байдаг. Тиймээс хүүхдүүдийн хувьд хүчирхийлэлд өртсөн үед тусламж дуудах нь нэн түрүүний асуудал байна.
Хүүхдэдээ шүгэл авч өгөх нь үнэтэй, зардал ихтэй зүйл биш. Энэ нь хүүхэд бие хамгаалах маш том хэрэгсэл” гэдгийг тэрбээр хэлсэн.
Шүгэл чухал, гэхдээ монгол хүүхдүүд ямар төрлийн хүчирхийлэлд өртдөг вэ?
Гэр бүл, хүүхэд залуучуудын хөгжлийн газраас 2022 онд танилцуулсан 2020, 2021 оны үзүүлэлтийг судалснаар үл хайхрах болон сэтгэл санааны хүчирхийлэлд хамгийн өртсөн байна.
Энэ үр дүнг Хүүхдийн тусламжийн 108 дугаарт ирсэн дуудлагуудыг төрлөөр нь ангилан гаргажээ.
Улсын ерөнхий прокурорын газраас Хүүхдийн эрхийг зөрчих зөрчлийн гаралт шийдвэрлэлтийн талаар зөрчлийн хэргийн 3048 материалыг нарийвчлан шалган судалсан байна. Энэ талаар УЕПГ-ын сургалтын албаны хяналтын прокурор, хуульзүйн ухааны доктор Б.Өнөрмаа olloo.mn болон zuv.mn сайтуудад танилцуулж ярихдаа хүүхдийн эрхийн зөрчлийн 88.5% нь орон гэртээ болдгийг онцолжээ.
Өөрөөр хэлбэл, хүүхэд хамгийн аюулгүй байх ёстой газраа хамгийн ихээр хүчирхийлэл, аюулд өртөж байгаагаас гадна хүүхдийн эрхийн зөрчсөн хэргүүдийн 65.8% нь төрсөн эцэг нь үйлдсэн гэсэн үр дүн гарсан байна.
Түүнчлэн хүүхдийн эрх 18:00-01:00 цагийн хооронд хамгийн их зөрчигддөг болох уг судалгаагаар гарчээ.
Гаднын орнуудаас жишээ татвал Япон улс аливаа гамшиг, ослоос хамгаалах зорилгоор хүүхдүүдэд шүгэл ашиглуулдаг байна. Мөн НҮБ-ын Хүүхдийн сан улс орнуудын хүүхдүүдэд хүчирхийллийн эсрэг ашиглахад зориулсан иж бүрдэлдээ шүгэл багтаадаг ажээ.
Эх сурвалжууд:
Гэр бүл, хүүхэд залуучуудын хөгжлийн газар
УЕПГ
