Товч агуулга

Аль ч вакцин хүний ДНХ-тэй харилцан үйлчлэлд орж, ямар нэгэн өөрчлөлт үзүүлэх боломжгүй. Тийм учраас хавдар үүсгэж чадахгүй.

КОВИД-19-ийн эсрэг вакцин биш, харин коронавирусийн халдвар нь үрэвсэл болон цусны бүлэгнэл бөгөөд зүрхний шигдээсээс эхлээд цус харвалт, эрхтнүүдийг гэмтээх хүртэл хүндрэл үүсгэдэг.

Эх Оронч Бүсгүйчүүд гэх фэйсбүүк хэрэглэгч 2022.09.10-ны өдөр “Вакцин хийлгүүлсэн хүмүүс цусаа шүүлгэх хэрэгтэй юм байна лээ!!! Тэгээд дахиж вакцин хийлгэхгүй байх!!! Удах тусам өвчлүүлж хорт хавдар харвалт болж байна!!!” гэсэн пост оруулжээ.

Тухайн постыг нягталж өгөх хүсэлт ирсний дагуу нягталлаа.

Factcheck 1:

АНУ-ын Нью-Йорк хот дахь Memorial Sloan Kettering Хавдрын төв(MSKCC)-өөс вакцинтай холбоотой худал мэдээллүүдийг залруулан нийтэлсэн байна.

Тус төв нь молекулын эмгэг судлалаас биомаркер хүртэлх анагаах ухааны талаарх мэдээ, дүн шинжилгээг хийдэг, эмнэлзүйн судлаачид, оношилгооны хөгжүүлэгчид, удирдлагууд, эмч нарт зориулсан найдвартай эх сурвалжид тооцогддог, 1971 онд Хавдрын иж бүрэн төв хэмээн албан ёсоор хүлээн зөвшөөрөгдсөн анхы төв ажээ.

Аль ч вакцин хүний ДНХ-тэй харилцан үйлчлэлд орж, ямар нэгэн өөрчлөлт үзүүлэх боломжгүй. Тийм учраас хавдар үүсгэж чадахгүй гэдгийг MSKCC тайлбарласан байна.

mRNA нь ДНХ-тэй адил биш бөгөөд хүний генетикийн кодыг өөрчлөхийн тулд ДНХ-тэй нэгтгэх боломжгүй.

mRNA вакцинууд нь коронавирусийн генетик кодын өчүүхэн хэсгийг ашиглан таны дархлааны системд халдвар авбал дархлааны хариу урвалыг өдөөх уургийг хэрхэн бүтээхийг заадаг. Өөрөөр хэлбэл, SARS-CoV-2-ийн эсрэг эсрэг биет үүсгэх зааврыг таны эсүүдэд хүргэдэг гэсэн үг. Харин таны ДНХ-г агуулж буй эсийн цөмд нэвтэрдэггүй. Тиймээс мРНХ-ийн вакцин нь хавдрыг дарангуйлдаг генийг ямар нэгэн байдлаар идэвхгүй болгодог гэсэн нь бодиттой биш, домог хэмээн зүйрлэжээ.

Factcheck 2:

КОВИД-19-ийн эсрэг вакцин биш, харин коронавирусийн халдвар нь үрэвсэл болон цусны бүлэгнэл бөгөөд зүрхний шигдээсээс эхлээд цус харвалт, эрхтнүүдийг гэмтээх хүртэл хүндрэл үүсгэдэг болохыг АНУ-ын Үндэсний эрүүл мэндийн хүрээлэн болон Жон Хопкинсын судлаачид хэлж буй.

ДЭМБ-ын мэдээлснээр КОВИД-19 цар тахал гарахаас өмнө зүрх судасны өвчлөл дэлхийн хэмжээнд нас баралтын тэргүүлэх шалтгаан байсан бөгөөд АНУ-д л гэхэд 2019 онд 17.9 сая хүн зүрх судасны өвчнөөр нас барсан нь дэлхийн нийт нас баралтын 32 хувийг эзэлсэн байна. Эдгээр нас баралтын 85 хувь нь зүрхний шигдээс, харвалтын улмаас нас баржээ.

Иймд вакцин хийлгэсэн хүмүүст хорт хавдар, харвалт болж байна гэдэг нь үндэслэлгүй, ТАШАА мэдээлэл байна.

Аливаа мэдээллийг үргэлж нягталж, албан ёсны, баталгаатай эх сурвалжаас авахыг Factcheck.mn сануулсаар байгаа билээ.

Эх сурвалжууд:

https://www.mskcc.org/coronavirus/myths-about-covid-19-vaccines

https://www.cancer.gov/research/infrastructure/cancer-centers/find/memorialsloankettering#:~:text=Memorial%20Sloan%20Kettering%20Cancer%20Center%20(MSK)%20was%20one%20of%20the,care%2C%20research%2C%20and%20education.

https://www.hopkinsmedicine.org/health/conditions-and-diseases/coronavirus/what-does-covid-do-to-your-blood

https://www.who.int/news-room/fact-sheets/detail/cardiovascular-diseases-(cvds)#:~:text=Cardiovascular%20diseases%20(CVDs)%20are%20the,%2D%20and%20middle%2Dincome%20countries.

НҮБ-ын Хүүхдийн сантай хамтран бэлтгэв.