Khulan Gankhuyag фэйсбүүк хаягаар “КОВИД-ын вакцины дараа бүсэлхийнээс доош мэдээгүй болсон сувилагч, зүрх нь хаагдсан онцгойгийн ажилтан, сэхээнд орсон эмнэлгийн it залуу нарын талаар үнэн бодит тайлбар өгөхийг Амбасэлмаа гуайгаас шаардаж байна!!!” гэсэн мэдээллийг гурвадугаар сарын 7-нд постолжээ.

Уг постыг 3.1К хүн шэйрлэж, 302 хүн коммент бичиж, 514 хүн хариу үйлдэл үзүүлжээ.

Бид энэхүү мэдээллийг нягталлаа.

Энэ мэдээллийг Эрүүл мэндийн яамнаас тодруулахад “Ийм зүйл огт болоогүй” хэмээн няцаасан бол мэдээлэлд нэр нь дурдагдсан доктор А.Амбасэлмаа мөн л “Ийм үйл явдал болоогүй” хэмээн үгүйсгэв.

Коронавирусийн эсрэг вакцинд хоёрдугаар сарын 23-наас хойш 20,976 хүн хамрагдаад байгаа бол дэлхий дахинд 305 сая хүнийг дархлаажуулалтад хамруулснаас 66.7 сая хүнийг бүрэн буюу хоёр тунг вакцинаар тарьжээ.

ХБНГУ-ын баримтыг нягтлагч албан ёсны редакц болох DW(Deutsche Welle)-ийн нягталснаар одоогоор коронавирусийн эсрэг вакцины улмаас хүн нас барсан нотолгоо алга.

Тус редакц Герман, Испани, АНУ, Норвеги, Болги, Перу зэрэг орны кэйсүүдийг судалсны үндсэн дээр нотлогдоогүй болохыг мэдээлээд байна. Эдгээр улсад 130 сая хүн вакцинд хамрагдаад байгаа бөгөөд улс тус бүрийн кэйсийг баталгаажуулжээ.

Монгол Улсын хувьд одоогоор коронавирусийн эсрэг АстраЗенека вакциныг ашиглаж буй. Энэхүү вакциныг хийлгэсний дараа тарьсан хэсэгт улайх, хавдах, хөндүүрлэхээс гадна халуурах, ядрах, толгой эргэх, дотор муухайрахыг зэрэг бусад вакцины үед илэрдэг шинж тэмдгүүд илэрч байгаа аж. Эдгээр хүндрэл нь 72 цагаас хэтрэхгүй гэдгийг АШУҮИС-ийн БиоАС-ийн Дархлаа судлалын тэнхимийн эрхлэгч, Эмнэлзүйн дархлаа судлаач эмч АУ-ы доктор Т.Хонгорзул COVID-19-ийн эсрэг вакцины талаарх Factcheck.mn-ийн зохион байгуулсан хэлэлцүүлгийн үеэр хэлсэн.

Коронавирусийн цар тахлын энэ үед вакцины талаар ташаа мэдээлэл ихээр гарч байгаа тул мэдээллийг сайтар нягталж байхыг дахин сануулж байна.