ЭМЯ-ны 2020 оны арваннэгдүгээр сарын 22-ны 17:00 цагийн ээлжит хурлын үеэр ЭМЯ-ны хэлтсийн дарга Д.Нарангэрэл “Коронавирус бохирдсон орчинд 3-72 цаг байдаг гэсэн ДЭМБ-ын болон олон улсын эрдэмтдийн судалгаа байгаа. Одоо манай оронд хүйтэн байгаа учраас гадаад орчинд вирус амьдрах нөхцөл байхгүй. Зөвхөн дотоод бохирдсон орчин, цаас, гадаргуу зэрэг дээр 3-72 цаг амьдрах чадвартай. Иймээс ЭМЯ дотоод орчны цэнвэрлэгээ халдвагүйтгэлийг байнга хийх ёстой гэдгийг зөвлөж байна” гэсэн юм.
Түүний хэлсэнчлэн хүйтэн болсон тул коронавирус гадаад орчин амьдрах чадваргүй болдог гэсэн мэдээллийг бид нягталлаа.
Түүнчлэн хамгийн чухал нь гадаах орчны температур хэд байхаас үл хамааран хүний биеийн дулаан 36.5-27 градус байдаг. Тиймээс коронавирусийн халдвараас өөрийгөө хамгаалах хамгийн үр дүнтэй арга нь гараа тогтмол савандаж угаах, спиртэн суурьтай ариутгагчаар ариутгах юм хэмээн ДЭМБ зөвлөжээ.
Ийнхүү ДЭМБ-ын зөвлөгөөтэй нийцэхгүй байгаа тул 2020.11.24-ний 11:00 цагийн ЭМЯ-ны ээлжит мэдээллийн үеэр тус яамны хэлтсийн дарга Д.Нарангэрэлээс “Өмнө нь та коронавирусийн халдвар хүйтэн агаарт байхгүй гэж хэлсэн. Коронавирусийн халдвар хүйтэн агаарт байхгүй, халдвар тархаахгүй гэсэн үг үү” хэмээн тодруулж асуухад тэрбээр
“Хамгийн гол нь хаана үржих вэ гэдэг дээр ярьсан. Битүү, агаар муутай орчинд вирус үрждэг. Үүнийг олон судалгаа харуулж өгч байгаа. Дөрөвдүгээр сарын дундуур БНСУ-ын караоке, баартай холбоотой өвчлөлүүд гарсан. Мөн манай оронд гарсан сүүлийн өвчлөлүүдийн зарим тохиолдлууд караокетэй холбоотой байгаа. Мөн дэлхий дахины олон судалгаа байна. Хүргэх үйлчилгээтэй, битүү, агаар муутай орчинд хадгалагдаж байсан сав, баглаа, боодлыг хадгалж байгаад энэнээс болж БНСУ-д өвчлөл гарсан тохиолдол байгаа. Ийм учраас бид агаарын солилцоог байнга хийх гэдгийг хэлсэн. БНХАУ-ын талаар олон судалгаа хэлж байсан. Гаднын орноос ирсэн хөлдөөсөн загас, хөлдөөсөн махны хайрцган дээрээс коронавирус илрүүлсэн.
Миний хэлсэн утга бол манай оронд гадаа ийм хүйтэн байгаа учраас гадаад орчин буюу агаарт коронавирус байх тохиолдол байхгүй. Энэ бол 2, 3 эрдэмтний хэвлэгдсэн судалгаан дээр байгаа. Харин дотоод орчинд, гадаргуу дээр, бохирдсон орчинд илүү байдаг гэдэг утгаар нь хэлсэн юм” хэмээн хариуллаа.
Дээр дурдсанчлан ДЭМБ коронавирусийг ямар ч цаг агаар дамжин халдварлаж болох бөгөөд хүйтэн цаг агаар үүнийг устгана гэж үзэх үндэслэлгүй гэж мэдэгдсэн.
ДЭМБ болон бусад байгууллага агааржуулалт муутай битүү орчинд халдвар дамжих нь илүү хялбар болохыг анхааруулсан байна.
Нягталсан: Ц.Тамир
