Товч агуулга
- Хүн худалдаалах гэмт хэргийн тухай тайлангаар Украин улс Дани, Герман, Япон улсын адил “чухал хүчин чармайлт гаргаж байгаа” орны тоонд багтсан бол ОХУ, Иран, Хойд Солонгос, Афганистан улс стандарт дагаж мөрддөггүй, хүчин чармайлт гаргахгүй байгаа орноор нэрлэгджээ.
- Украин орчин үеийн боолчлолын тархалтаар 50 орноос 7-д бичигдсэн ч хүний наймааны үзүүлэлтээр 1-т бичигдсэн нэг ч тайлан байхгүй.
- ОХУ-д хүүхэд худалдаалах гэмт хэргийн асуудал Украиныхаас илүү ноцтой байна.
- Хүний наймаа буюу орчин үеийн боолчлолд дэлхий даяар жилд 20-40 сая хүн өртгөдөөс 20% нь хүүхдүүд байна.
Bolormaa Natsagdorj гэх фэйсбүүк хэрэглэгчийн “Нэг их Украйнд санаа зовсон хүмүүс. Цаад учир шалтгааныг хэдэн хүн мэдэх юм бол? Энэ улс хүний наймааны гол улс болсонд бгаа юм. Шулуухан хэлэхэд түүнийг цэвэрлэх гэж бгааг олон сувгаас уншлаа!!! Нато Орос асуудалгүй. Жилд дэлхийд 20 сая хүн алга болдог, түүний 50% нь хүүхэд!!!” гэсэн постыг нягталж өгөх хүсэлт ирсний дагуу нягталлаа.
2022.02.13-нд нийтэлсэн уг постыг 26 хүн шэйрлэж, 211 хүн лайк даржээ.
Factcheck:
ОХУ 2022.03 сард Украинд дайн эхлүүлсний дараачаас буюу дөрөвдүгээр сараас нь дээрх агуулгатай пост олон нийтийн сүлжээнд ихээр цацагджээ. Иймд уг мэдээллийг олон улсын баримт нягтлагч гол талбар болох Politifact болон USA Today зэрэг томоохон мэдээллийн сайтын баримт нягтлагчид шалгасан байна.
Вашингтонд төвтэй, хүний наймааны эсрэг олон улсад манлайлан ажилладаг гол институт гэгддэг The McCain Institute Хүний наймаатай тэмцэх газрын ахлах захирал Кристен Леандерсон Абрамсын тайлбарласнаар АНУ-ын Төрийн департаментын жил бүр гаргадаг Хүн худалдаалах гэмт хэргийн тухай тайлан нь хамгийн гол баримт бичиг буюу “алтан стандарт” гэж болно хэмээн USA Today-д тайлбарлажээ.
Уг тайланг гаргахдаа дэлхийн улс орнуудыг гурван шатлалаар авч үздэг байна. Үүний I шатлал нь тухайн улс хүн худалдаалах гэмт хэргийн эсрэг хамгаалалтын актын наад захын стандартыг бүрэн дагаж мөрдөж байгааг харуулж байгаа бол II шатлал нь тухайн улс бүрэн дагаж мөрдөхгүй байгаа хэдий ч бүрэн дагаж мөрдөхийн тулд “чухал хүчин чармайлт” гаргаж байна гэсэн үг аж. Гуравдугаар шатлал нь тухайн улсын Засгийн газар стандартыг дагаж мөрддөггүй бөгөөд үүнийг хэрэгжүүлэхийн тулд хүчин чармайлт гаргахгүй байгааг харуулдаг байна.
2021 онд буюу дайн гарахаас өмнө хамгийн сүүлд хийгдсэн тайлангаар Украин улс дээрх ангиллын II шатлалд багтсан бөгөөд тус улсын хамт Дани, Герман, Япон улс бичигджээ. АНУ I шатлалд Англи, Канад орны хамт бичигдсэн бол ОХУ, Иран, Хойд Солонгос, Афганистан улс III шатлалд эрэмбэлэгдсэн байна.
Кристен Леандерсон Абрамс мөн хүний наймааны эсрэг “Walk Free”, Олон улсын хөдөлмөрийн байгууллага, Олон улсын цагаачлалын байгууллагын үйл ажиллагааг чухалчилжээ. Эдгээр бүлгүүд нь орчин үеийн боолчлол болох хүний наймаа, хөдөлмөрийн мөлжлөгийн талаар олон тайлан гаргадгийн нэг болох Дэлхийн боолчлолын индекс нь орчин үеийн боолчлолын мэдээллийг улс орон тус бүрээр нь авч үздэг байна.
Дайнаас өмнө хамгийн сүүлд буюу 2018 онд гаргасан тус индексийн тайланд Засгийн газруудыг өөрсдийн хил доторх орчин үеийн боолчлолд үзүүлж байгаа хариу арга хэмжээнээс нь хамааруулан BBB болон CCC зэрэг дунд түвшнийг А-аас D хүртэлх шатлалаар үнэлжээ.
Уг индексээр зөвхөн Нидерланд л А үнэлгээ авсан бол дараагийн хамгийн өндөр үнэлгээ буюу ВВВ-г АНУ авсан байна. Украйн улс ВВ ангилалд багтсан бол Хойд Солонгос, Ливи D гэсэн ангилалд үнэлэгджээ.
Тайлангийн бусад хэсэгт үзүүлэлтүүд бага зэрэг өөрчлөгддөг бөгөөд Европ болон Төв Азийн орчин үеийн боолчлолыг үзүүлэлтээр Украин орчин үеийн боолчлолын тархалтаар 50 орноос 7-д бичигдэж, 1000 оршин суугч тутамд 6.4 хохирогч ногдож байгааг дурдсан байна. Гэхдээ хүний наймааны үзүүлэлтээр Украин улс 1-т бичигдсэн нэг ч тайлан байхгүй гэдгийг энд онцолжээ.
Түүнчлэн ОХУ-д хүүхэд худалдаалах гэмт хэргийн асуудал Украиныхаас илүү ноцтой байгаа гэж АНУ-ын Төрийн департаментын сүүлийн үеийн хүний наймааны тайланд дурдсан байна. Хоёр улс энэ асуудалтай тэмцэж байгаа тухай тайланд дурдсан ба Украин 2020-2021 оны хооронд асуудлыг шийдвэрлэх арга хэмжээ авсан бол Орос уг асуудлыг арилгахын тулд хүчин чармайлт гаргаагүй гэж дүгнэжээ.
Хүний наймаа буюу орчин үеийн боолчлолд дэлхий даяар жилд 20-40 сая хүн өртгөдөөс 20% нь хүүхдүүд байна. Энэ нь 20 сая хүн ор сураггүй алга болдог гэсэн үг биш бөгөөд 50% нь хүүхэд гэдэг нь хол зөрүүтэй тоо байна.
Иймд дээрх пост дахь агуулга бүхэлдээ ХУДАЛ буюу олон нийтийг төөрөгдүүлжээ.
ОХУ-ын эхлүүлсэн дайн өнөөдрийг хүртэл хоёр жил гаруй хугацаанд үргэлжилж байгаа бөгөөд тус улсын түгээж байгаа худал мэдээлэл цахим орчинд тархсаар байгаа билээ. Ялангуяа, хоёр жилийн өмнө гарсан постуудыг одоо болтол дахин шэйрэлж, нийтэд түгээсээр байгаа юм. Иймд дайнтай холбоотой аливаа мэдээллийг олон эх сурвалжаар баталгаажуулж, албан ёсны эх сурвалжаас мэдээллээ авч нягталж байхыг Factcheck.mn сануулж байна.
